香橙雪芳蛋糕 Orange Chiffon Cake

        又係清蛋白、整雪芳嘅時間喇！今次專登為 Bill 整咗個香橙雪芳蛋糕，因為之前我問過佢有咩鍾意食，佢就話鍾意食橙囉，咁所以我就試吓整呢個雪芳蛋糕，星期五同佢上堂時就帶埋過去俾佢。

雪芳蛋糕

材料：
低筋麵粉      80 克
蛋白             4 個
蛋黃             3 個
糖                 50 克
橄欖油          25 毫升
橙酒             1 茶匙
鮮榨橙汁      60 毫升
橙皮茸         1 個橙份量

- 麵粉過篩 3 次；他他粉加入蛋白內，用電動打蛋器打至起泡。

- 將其中 30 克糖分 3 次加入，打成蛋白霜，之後放入雪櫃保存。

- 蛋黃加糖，用電動打蛋器以低速拌勻，之後分別拌入橄欖油、橙酒同橙汁。

- 篩入麵粉，加埋橙皮茸，拌勻成麵糊。

- 將 1/3 份蛋白霜加入麵糊內，低速拌勻，之後加入剩低嘅蛋白霜，用膠刮拌勻。

- 將麵糊倒入模內，然後喺枱面輕敲數下，釋出較大氣泡。

- 放入已預熱至 180 °C 嘅焗爐內焗約 25 - 30 分鐘，出爐後立即倒扣攤凍。

- 蛋糕脫模備用。

 

橙酒糖霜

材料：
糖霜             100 克
橙酒             1 湯匙
水                 約 1 - 2 茶匙

- 先將糖霜同橙酒倒入細煲內，再逐小加水拌勻。

- 用慢火略為加熱至接近 34 °C。

- 當煮到黏稠時，趁熱將糖霜倒上蛋糕面，待糖霜凝固之後即可切件享用。

以上材料份量可做直徑 17 厘米蛋糕 1 個。

食譜出自福田淳子嘅《好吃戚風蛋糕輕鬆上手》。

 

成個蛋糕，表面嗰層糖霜先至係精緒，

如果無咗佢，肯定大大失色！

 

 

 

 

 

 

勁橙味呀！如果你係 "橙精" 的話，咁你一定要試吓喇！

 

 

 

Notes：
- 原食譜中糖嘅用量為 70 克；而橄欖油用量為 35 毫升。

- 蛋白霜拌入麵糊時必須輕手，以免消泡，影響蛋糕膨脹。

- 食譜提到，橘類果汁容易令蛋白霜消泡，所以我自己就加入少少他他粉，令到蛋白
  霜比較穩定。

- 煮糖霜時切勿煮過火，否則會變稀之餘，顏色亦會變成透明。