蒜香海味西蘭花

        聽見個名就好似好矜貴咁，但其實都之不過係用咗蝦乾同吊桶乾啫！

材料：
西蘭花
吊桶乾
蝦乾
薑茸
蒜茸

調味料：
鹽
糖
紹酒

        西蘭花用米水浸洗後，切切備用；吊桶乾同蝦乾先洗乾淨，然後用熱水浸軟，之後切絲 ( 浸過吊桶乾同蝦乾嘅水可以留番嚟煮菜 )。

        燒熱油鑊，用一半薑茸同蒜茸起鑊，然後加吊桶乾同蝦乾絲一齊爆香，贊酒後炒兩炒就盛起備用。爆香埋另一半薑茸同蒜茸，加入西蘭花炒幾炒，將調味料加入後，倒番之前浸過吊桶乾同蝦乾嘅水落鑊，之後冚蓋將西蘭花煮熟，最後將之前爆香咗嘅海味絲回鑊，兜兩兜就可以上碟。

        雖然炒西蘭花係一個既簡單又普通嘅餸，不過加咗吊桶乾同蝦乾之後，就即刻變得不平凡，仲惹味好多 o添！