西芹腰果炒魚柳

        星期一買咗棵西芹，用咗一半嚟煲素西湯，留起咗一半今日用嚟炒魚柳。

材料：
西芹
腰果
白魚柳
尖青椒
蒜片
雞蛋
粟粉

醃料：
鹽
糖
胡椒粉
即磨五色胡椒

調味料：
鹽
糖
蠔油
紹酒
麻油

        西芹洗乾淨後切段備用；魚柳洗乾淨，用抹手紙索乾水份，之後加醃料醃好；腰果洗淨、用滾水煲幾分鐘，之後同樣用抹手紙索乾水份，然後炸至金黃色，而我就梗係用焗爐烘焗啦，唔駛落油嘛！青椒就洗乾淨，切去頭尾及內裡的核，之後切細段。

        雞蛋拂打成蛋液，將醃好咗嘅魚柳先撲上粟粉，再蘸上蛋液，放平底鑊內，將兩面略為煎香，盛起備用。

       

        跟住爆香青椒同蒜片，贊少少酒，炒兩炒後先盛起青椒，蒜片留鑊內。落西芹兜炒，加少少水，冚鑊蓋煮到稍為軟身後，就可以將煎香咗嘅魚柳回鑊，並加入調味料，兜炒均勻之後，熄火，最後加埋腰果落去兜兩兜，就即刻盛起。

        記得熄咗火先落腰果，如果唔係啲腰果就會好快變腍，唔好食 o架喇！