雪裡紅百合炒鮮腐皮

        今晚煮嘅第二道素菜同樣咁簡單、快手，所以今晚都幾輕鬆，不過準備功夫都唔少，仲耐過煮呀！

材料：
鮮腐皮
鮮白合
雪菜

調味料：
糖
素鮑汁

        鮮腐皮用水輕輕沖洗，之後就將佢撕成細塊；鮮白合洗乾淨，將啡色唔靚嘅部份切走；雪菜要預先浸水，大約 20 - 30分鐘到啦，咁可以減低鹹味，之後洗乾淨 ( 洗完之後會見到有沙沉底 )，用較剪將佢剪碎，再用糖醃約半日。

        燒熱油，先放雪菜落鑊炒香，跟住就加入腐皮，兜兩兜後就可以加埋百合，再放調味料，快手炒幾吓就可以上碟。記得落咗百合後就唔好炒太耐，因為要保持鮮百合爽脆，煮得太耐仲會溶鬼埋 o添呀！

        雪菜鮮味，鮮百合清甜爽口，加埋鮮腐皮嘅豆香，真係味覺多層次嘅享受。如果鍾意食辣嘅話，可以喺爆香雪菜嘅同時加埋紅椒粒一齊炒，但因為今晚另外果碟沙茶鮮菇豆腐已經係辣 o架啦，所以呢碟唔落紅椒 lu。