白果薏米腐竹糖水

            一個簡單易做又好味嘅湯水，原來都有食療價值。我睇番中醫師何樹勛博士寫嘅《保健湯水》都有教煲呢個湯水，可以治哮喘、利小便、去水腫、清熱除痰，生薏米仲可以抗癌療癌 㖭！不過冬天都係唔好飲太多，一來糖水本身較寒涼，二來因為去水利尿，冬天就要成日去廁所！

 

 

材料：
白果
薏米
腐竹
冰糖
雞蛋

- 白果先剝殼，然後去衣、去芯；薏米洗淨後用水浸約半個鐘；腐竹洗乾淨，用水
  浸軟。

- 煲滾水後，先放白果同薏米煲一陣間。

- 之後放埋浸軟咗嘅腐竹，再煲多一陣，見腐竹滾爛後，就可以放番落真空煲度。

- 到食之前半個鐘拎番出嚟煲番滾，然後加冰糖。

- 當所有冰糖都煮溶哂時，就可以打雞蛋入糖水度，蛋煮熟後就攪掂。