沙茶鮮菇豆腐

        今日係二月初一，聽到我咁講，就知道我今日會煮齋菜啦！

材料：
新鮮草菇
腍豆腐

調味料：
糖
素沙茶醬

        草菇先洗乾淨，用刀喺菇頂切開約 1cm 深嘅十字花，然後用加有少少白醋嘅滾水汆水，去除 "up" 味。跟住過冷河備用。

        先將沙茶醬爆香，之後就加入草菇兜炒，因為草菇預先汆過水，所以唔駛炒太耐，否則就縮哂水，唔見食 o架喇！跟住就可以加埋啲豆腐落去，落埋糖，兜番熱就食得，如果唔想啲豆腐太過碎，就記得唔好猛咁炒，炒到啲豆腐爛哂，好似整蛋糕麵糊咁 fold 就得架喇。

        煮呢碟餸又快手、又好食，你哋都試吓啦！如果煮葷的話，就可以先用蒜茸起鑊，再用一般嘅沙茶醬煮都得。