油爆紅辣椒

        屋企雪櫃長期都會擺定一樽油爆紅辣椒喺度，方便隨手就攞嚟煮餸，或者食湯粉麵時用。媽咪之前整落果啲已經食哂喇，所以今次我要自己親手整喇！

材料：
紅辣椒 (指天椒)
橄欖油
鹽

嘩，睇見好恐怖呀！但最恐佈嘅事一陣間先出現！！  

       先將紅辣椒洗乾淨，之後用較剪剪成辣椒粒。將辣椒粒放入鑊內，用白鑊炒至有煙出，以炒乾內裡水份。恐怖嘅酷刑卒之都嚟喇，有睇過烹飪節目嘅朋友都應該知道，當主持人要爆炒辣椒時，都一定會咳到無命，因為爆辣椒嘅味道係好嗆喉，好難頂 o架，簡直可以比美 "黑太陽 731" 啦！！記得之前媽咪整果陣，我都有喺 "案發現場"，知道箇中滋味，所以今次我都做足防禦措施：

 - 打開哂廚房同露台所有窗

 - 開行部油煙機

 - 食定粒勁薄荷嘅草本精華 "曬駱駝"

 - 全程用手掩住鼻同口

 - 要呼吸就走到窗口前，避免吸入 "毒氣"

        咁就舒服好多喇，不過始終都係咳咗一陣子，但唔算嚴重囉，係咪覺得好誇張呢！唉，又要怕，又要食，又要整，癡線 o架！？ 

        講番正題先，當見到啲辣椒籽炒到金黃色時，就可以加入橄欖油繼續炒，直至辣椒吸收哂大部份油為止，最後加入鹽，兜勻就攪掂。

        記得落多少少油，因為可以延長保存期，相反，鹽就唔好落太多，雖然都可以幫助延長保存期，但落得太多的話，會令到餸菜嘅味道較難掌握，失去預算而變得太鹹。