2009年2月18日星期三

油爆紅辣椒

        屋企雪櫃長期都會擺定一樽油爆紅辣椒喺度,方便隨手就嚟煮餸,或者食湯粉麵時用。媽咪之前整落果啲已經食哂喇,所以今次我要自己親手整喇!




材料:
紅辣椒 (指天椒)
橄欖油





嘩,睇見好恐怖呀!但最恐佈嘅事一陣間先出現!!  



       先將紅辣椒洗乾淨,之後用較剪剪成辣椒粒。將辣椒粒放入鑊內,用白鑊炒至有煙出,以炒乾內裡水份。恐怖酷刑卒之都嚟喇,有睇過烹飪節目嘅朋友都應該知道,當主持人要爆炒辣椒時,都一定會咳到無命,因為爆辣椒嘅味道係好嗆喉,好難頂 o架,簡直可以比美 "黑太陽 731" 啦!!記得之前媽咪整果陣,我都有喺 "案發現場",知道箇中滋味,所以今次我都做足防禦措施:

 - 打開哂廚房同露台所有窗

 - 開行部油煙機

 - 食定粒勁薄荷嘅草本精華 "曬駱駝"

 - 全程用手掩住鼻同口

 - 要呼吸就走到窗口前,避免吸入 "毒氣"

        咁就舒服好多喇,不過始終都係咳咗一陣子,但唔算嚴重囉,係咪覺得好誇張呢!唉,又要怕,又要食,又要整,癡線 o架!? 

        講番正題先,當見到啲辣椒籽炒到金黃色時,就可以加入橄欖油繼續炒,直至辣椒吸收哂大部份油為止,最後加入鹽,兜勻就攪掂。

        記得落多少少油,因為可以延長保存期,相反,鹽就唔好落太多,雖然都可以幫助延長保存期,但落得太多的話,會令到餸菜嘅味道較難掌握,失去預算而變得太鹹。



2 則留言:

  1. Hi~請問一瓶大约可儲存幾耐呀?thx
    [版主回覆03/26/2009 10:44:00]        嘩,真係唔知喎!我對上果樽最少都擺 咗兩年以上,應該唔只 o添呀!只要油多就可以擺好耐好耐 o架啦!不過最緊要係放入雪櫃呀。

    回覆刪除
  2. 唔該晒ar...我又試下整先
    你話炒辣椒時好攻鼻.....帶埋口罩會不會好D呢
    [版主回覆03/27/2009 14:12:00]        未試過喎,不過我 諗總好過 "無遮無擋"!應該濕毛巾會仲好,不過好似好 "大陣像" 咁囉!

    回覆刪除