燕麥包 Oatmeal Bread

        長假期今日正式開始，所以今朝早唔駛去老人中心教唱歌，晏晝教完 Ryan 之後就返屋企無嘢做，所以 plan 咗今日整麵包。

        已經隔咗好耐無整包包喇，所以都係整番個 "熟手包" 先，起碼個腦都叫做有啲印象嘛！咁整邊個呢？我揀番 Rachel 個燕麥包呀，因為始終都係比較鍾意食歐陸包多啲，而且呢個包又真係好好食，特別鍾意一粒粒燕麥嘅煙韌口感，正！我仲記得上次喺 Louisa 屋企同 Winnie 一齊整時，Genevieve 鍾意到不停口咁食呢！

 

老麵

材料：
高筋麵粉      300 克
水                200 克
即用酵母     5 克
鹽                1 克

- 將所有材料混合搓成麵團，之後滾圓。

- 將麵糰放入已搽油或灑粉嘅兜內，冚上保鮮紙，發酵 2 - 3 個鐘。

- 完成發酵後，將麵糰排氣，並分割成每個重 50 克嘅小麵糰。

- 之後將小麵糰分別滾圓，即成。

燕麥包

  

材料：
高筋麵粉      220 克
全麥粉         30 克
麥芽粉         1 茶匙
老麵             50 克
鹽                 5 克
即用酵母      4 克
水                 130 毫升
橄欖油          20 毫升
煮熟燕麥      160 克
糖                 10 克

 
- 將麵粉、酵母、糖、全麥粉、小麥胚芽、老麵、橄欖油同水混合，搓成麵糰。

 
- 然後加入鹽，繼續搓成光滑麵糰。

 
- 加入燕麥，搓到完全混合好為止。

 
- 將麵糰滾圓，放喺已搽油或灑粉嘅兜內，冚好保鮮紙，進行第一次發酵，時間
  約為 1 個鐘，麵糰大約發大兩倍。

 
- 將麵糰拎出，翻轉放上工作枱上，先上下向中間摺入，再左右摺入，之後放番
  入兜內作第二次發酵，發酵時間約 30 - 45 分鐘。

 
- 發酵後將麵糰拎出滾圓，放入已灑上手粉嘅發酵籐籃內作最後發酵，麵糰發大約
   3 倍。

 
- 發酵完成後，用刀片或利刀喺麵糰表面 "界" 出花紋，之後放上已鋪入爐防黏紙
  嘅烤盤上，放入已預熱至 200 °C 嘅焗爐內焗 30 分鐘。

 
- 其間每隔 10 分鐘就要喺爐內噴水 1 次，共噴水 2 次。

 
- 焗好之後放上架上攤凍。

 
食譜係嚟自 Rachel Yau 嘅《知廚之樂》。

 

 

 

呢啲係煮熟咗嘅燕麥，係上次 Rachel 送俾我同 Louisa 嘅，
如果唔係見到實物，都真係估都估唔到原來燕麥係
咁嘅樣，仲以為係平時食開果隻 rolled oat 呀！      

 

 
 

 

焗緊嘅時候已經聞到陣陣麵包香，到出爐時，
嘩，真係香到想即刻食呀！

 

今次用咗 food processor 個 dough tool 嚟搓麵糰，真係
又快又慳力，之後用手搓多幾吓就已經 OK 喇！

 

 

賣幾百蚊個嘅發酵籐籃我真係唔捨得買呀！呢兩個代替品其實

係個研磨砵嚟㗎，係喺 JUSCO $10 店買嘅，見到佢啲坑紋

都幾似麵包紋，咁咪貪得意買返嚟試吓囉，點知都

OK 喎，成品都見到紋呀！我上次專登等到

會員日有 9 折先買，兩個盛惠 $18，不過

就只可以做細 size 嘅麵包囉！

 

 

 

 

 

 

今日無端端天氣又涼番好多，麵包發酵時間又會增長好多。好彩

我個焗爐有發酵箱功能，維持係 40 °C，所以今日發酵
同天氣暖嘅時候無乜分別，一樣咁快手。

 

 

聽日 Lily 會嚟上堂，咁細果個就留番俾佢啦，因為佢都係
好包之人，佢間中都會去 「Pumpernickel」
度買黑麥包俾我食㗎！

 

 

 

 

今晚因為得自己一個人食，簡簡單單就算，新鮮出爐嘅燕麥包加
火腿奄列，再加碗忌廉雞湯就已經係晚餐喇。
哈哈，又係懶人餐一道呀！

 

Notes：

- 發酵後嘅老麵糰可用保鮮紙或膠袋分別包好，儲存喺冰箱內，到需要用之前拎番
  出嚟室溫解凍即可。

- 如果無新鮮酵母的話，亦可用乾酵母或即用酵母代替，但份量就有所調整，請參
  考《不同種類酵母用量之調整》。

 

- 原食譜小麥胚芽只係用 1 茶匙，但我自已就用到 2 茶匙。