翠玉瓜鬆餅 Zucchini Muffin

        最初見到呢個食譜時，好吸引我呀！因為原食譜係寫住「意大利青瓜鬆餅」，咁我就即刻諗到兩個問題：第一，點解指定要用意大利青瓜呢，有咩特別，同一般青瓜有咩唔同？第二就係，青瓜咁易出水，乜真係可以用嚟整蛋糕咩？於是我就上網搵吓資料，原來意大利青瓜個意文寫法係 zucchini，同翠玉瓜個英文完全一模一樣，再搵吓相睇，點知幾乎同翠玉瓜一模一樣咁滯，只係比翠玉瓜深綠色啲，同埋有啲品種係黃色。咁所以我就知道其實係可以用翠玉瓜代替，同埋唔駛怕有水出啦，因為翠玉瓜根本唔會化水！加上發覺原來有好多網友都整過翠玉瓜蛋糕，所以我先大膽一試咋！

材料：
全麥麵粉      100 克
低筋麵粉      100 克
泡打粉          1 茶匙
梳打粉          1/4 茶匙
肉桂粉          1/4 茶匙
鹽                  1/8 茶匙
雞蛋              1 隻
黃糖              80 克
鮮奶              80 毫升
植物油          60 毫升
翠玉瓜          100 克

 

- 將所有粉類同鹽過篩 3 次，翠玉瓜洗乾淨後刨成絲。

- 雞蛋拂打成蛋液後，加入糖、奶及油拌勻。

- 蛋液混合物加入粉料內拌勻，之後加入翠玉瓜絲混合。

- 將麵糊倒入紙模內並放上烤盤，放入已預熱至 180 °C 嘅焗爐內焗 20 - 25 分鐘。

- 出爐後放上架上攤凍。

以上材料份量可做鬆餅 6 個。

食譜嚟自關琬潼嘅《低糖甜點》。

未焗之前似肉醬，焗完之後就似肉丸！

 

 

好香肉桂味，但翠玉瓜就唔係好食得出。

 

裝起一袋要嚟送禮都唔錯。

 

Notes：
- 原食譜有落到提子乾。

- 如果唔想用全麥粉，可以直接用 200 克低筋麵粉。

- 加入麵粉攪拌時，當所有材料一拌好就要立即停手，以免麵糊起筋。