野葛菜白鯽煲西施骨

        老豆喺農場拎咗啲野葛菜返嚟，我都唔知點煲好，煲齋湯又驚太涼，我會頂唔順，於是今晚呢煲湯就由老豆發板，佢仲買埋條白鯽返嚟等我煲 o添，可能佢都發覺好似我咁講，街市真係無 "瞓覺" 生魚賣啦！所以佢索性買埋返嚟，費事我喺個街市度周圍巡！！話時話，我都唔知幾耐無食游水魚囉，睇怕都一定超過十年喇！

材料：
野葛菜
白鯽魚
西施骨
蜜棗
陳皮
薑片

- 蜜棗、陳皮用熱水浸軟，蜜棗略沖洗，陳皮刮去白瓤；野葛菜洗乾淨，備用。

- 西施骨洗乾淨、汆水，之後過冷河，沖走多餘脂肪及血水。

- 鯽魚打鱗、去內臟，洗乾淨後，放入燒熱油鑊內，加薑片煎至兩面金黃。

- 除鯽魚外，全部材料凍水落煲，煲大滾後，加埋煎好嘅鯽魚一齊煲。

- 煲好之後落鹽調味即可飲用。

 

呢啲就係野葛菜喇！老豆拎咗好多好多返嚟，多到我個超大真空煲
都裝唔哂，於是我就將多出嚟果啲野葛菜俾咗
Gordon 拎返屋企煲湯。

 

洗啲野葛菜洗咗我好耐呀，你睇，每條菜根我都洗到乾乾淨淨、白雪雪，
真係企到腳都跛呀！睇吓盆洗菜水就知有幾污糟啦！
呢次都仲係第一過水咋！

Notes：
- 老豆話野葛菜啲根唔好切去，要連埋一齊煲，所以要徹底洗乾淨。

- 煎魚時加幾片薑，可以幫助去除魚腥味。

- 除白鯽魚外，亦可用生魚代替。

 

P.S.  Gordon 上嚟拎啲野葛菜時，佢話上次我整俾佢果樽柑桔橙皮果醬勁好食喎，我話我都唔知味道係掂，因為之前樽柚子芒果醬仲未食完，所以未開嚟食呀，不過可以肯定，可以好成功咁整到樽果醬囉！

 

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！