臘味蒸芋蓉

        最近啱啱先睇番鮑汁飛教整臘味芋蓉粒果集《蘇 Good》，我睇到一半已經決定要整嚟食，因為睇見已經覺得好正、好好食，皆因我係好鍾意食芋頭 o架！而且見唔係太難整，起碼易過整蘿蔔糕先啦！

        不過材料方面我就有少少改動，無用到見到都驚嘅臘肉，改用蝦米代替；而淡奶就用淡忌廉代替，因為我係唔飲奶嘛！我仲加咗少少五香粉 o添，所以蒸出嚟嘅芋蓉特別香。

老豆都讚好食，仲話好香、好夠味 o添！

材料：
芋頭
臘腸
膶腸
蝦米
淡忌廉
蔥花

調味料：
糖
鹽
五香粉
紹酒

- 芋頭去皮後切開兩邊，隔水蒸熟，一半壓成芋蓉，另一半則切粒。

- 臘腸蒸至軟身；蝦米洗乾淨，用暖水浸軟，之後將兩樣材料切粒，備用。

- 芋蓉加入適量淡忌廉、水、鹽、糖同五香粉，拌勻至糊狀。

- 之後將芋蓉放置一邊，等佢慢慢吸收忌廉及水份後再次加入忌廉及水拌成糊狀。

- 燒熱油，將臘腸粒同蝦米粒爆香，之後加入芋頭粒，灒酒，兜炒一陣。

- 將炒好嘅材料加入芋蓉內，均勻混合。

- 將所有材料倒入碟內，用中火蒸約 15 - 20 分鐘。

- 之後灑上蔥花，再蒸多兩分鐘即可。

Notes：
- 揀芋頭時最好揀比較輕身嘅，越輕身的話，水份就越少，即代表芋頭就越粉。加上
  我自己嘅經驗，可以睇吓切口嘅花紋，花紋越多，越深紫色，就代表芋頭越粉。

我今次買呢個芋頭好多花紋，所以切去外皮嘅時候已經 feel 到好粉喇！

- 芋頭蒸熟之後，趁熱壓成芋蓉會比較容易；相反，芋頭攤凍之後先切粒就無咁容
  易爛。

- 可用鮮奶或淡奶代替忌廉及水；浸蝦米水亦可留番加埋入去撈芋蓉。

- 芋蓉嘅濃稠度可依個人喜好調校。

- 蒸芋蓉時，只需蒸番熱即可，因為所有材料其實已經煮熟。

- 唔介意油膩的話，可以直接灒熟油上蔥花上而毋須額外再蒸多兩分鐘。

 

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！