紅豆南瓜煎軟餅

喺《家常便飯》度咪話菜檔阿姐介紹我買咗成個南瓜嘅，雖然唔係好大個，但始終自己一個人食，又點會食得哂呢！所以一個瓜用嚟整幾樣嘢都得呀！

之前咪問過大家我煮日式紅豆餡嚟做乜嘅，咪就係整呢個中式甜品囉！係呀，咪就係用日式材料整中式甜品咋嘛！

 

材料：

南瓜肉 80 克

粘米粉 15 克

糯米粉 90 克

糖 10 克

日式紅豆餡 80 克

 

- 南瓜肉切細後蒸至軟身，隔去多餘水份，用叉壓爛成南瓜蓉，南瓜水留用。

- 粘米粉及一半糯米粉、糖混合好，將熱南瓜蓉加入，用膠刮拌勻成糰。

- 將剩餘糯米粉加入，逐少加入南瓜水搓成光滑軟熟粉糰。

- 粉糰平均分成 8 份，將細粉糰搓圓後壓扁、壓薄，分別包入 10 克紅豆餡。

- 捏緊收口，搓圓後輕手略為壓平。

- 燒熱油，將粉糰放入，用慢火煎至兩面稍為硬身。

- 加入少量水，冚上鑊蓋煎焗至水份完全蒸發。

- 打開鑊蓋，將兩面煎至金黃香脆即可上碟。

 

以上材料份量可做煎餅 8 件。

個個煎餅都煎到金金黃黃，外型又 "圓碌碌"，好啱用嚟做賀年甜點喎！

餅皮煙煙韌韌，自家製作嘅紅豆餡又唔會太過甜，
鍾意食糯米糍嘅朋友肯定鍾意呢個煎軟餅呀！

Notes：

- 加水煎焗時必須冚上鑊蓋，藉此用水蒸氣將粉糰焗至熟透。

- 日式紅豆餡製作方法，請參閱《日式紅豆餡》。

- 搓粉糰時可加入少許油，令到粉糰更加柔軟。