2013年5月17日星期五

2013 佛誕

眾師兄們,佛誕快樂,阿彌陀佛!

往年嘅佛誕都會去浴佛,今日本來唔諗住去喇,因為天色唔好,個人又超攰,買完餸返屋企都唔想再落街,於是咗大半個鐘,起身之後就浸定菜、準備材料煮齋供佛,點知正當我整整嘢時,天色突然轉晴,睇嚟個天都就哂我,要我出去浴佛,無藉口唔去!

一路行出去望海觀音時,雖然唔係陽光普照,但都絕對唔陰天,但係一到咗望海觀音準備浴佛時,天色突然轉黑,仲落起毛毛雨㖭,心諗,無帶遮點算?好彩場地搭起哂帳蓬,唔使濕身。點知只係短短數分鐘時間,完成哂所有儀式後,準備走人時,又即刻停咗雨,所以一路返歸路上都完全無落過雨,真係好彩,果然發心禮佛,功德無量!





噚日去大角咀教琴,太子係必經之地,所以順便走過去花墟
買花。呢幾枝白玫瑰超靚,而且又唔貴,$15 / 5 枝,
好過廿幾三十蚊買紮丁香供佛啦!









今日都係煮南乳齋供佛,同平時唔嘅係,今次用咗韓國粉絲煮。因為今日
嘅份量唔多,自然南乳都用得少,所以顏色一定唔夠紅,
但係一落紅麴之後,即刻靚哂,夠哂色水喇!


2 則留言:

  1. 原來你信佛
    [版主回覆05/18/2013 18:55:41]係呀,不過唔係一個好如法嘅佛弟子囉!

    回覆刪除
  2. 緊張大師-小女人2013年5月18日 下午6:27

    你去那浴佛呀,我今年無去呀,因為一早就下雨仲要無人陪我去所以我先生唔比我一個人去.我都想搵埋你一齊去架,只是個天黑成咁....下午開始有陽光了.白玫瑰咁平既.我沒有煮齋只吃了素.
    [緊張大師-小女人回覆06/02/2013 21:21:57]哈哈哈,咁又真.
    [版主回覆05/31/2013 15:59:30]我都係估咋,我又唔係女人,更加唔係 lesbian 啦!
    [緊張大師-小女人回覆05/28/2013 17:25:44]哦.......係咁樣咩???我們好難會明白同了解的
    [版主回覆05/28/2013 15:27:51]不過好似聽講話佢哋一遇到個真命天子的話就會立即退隱,兩人長廂斯守,可能就係因為咁而要不斷結識新朋友,希望盡快離開呢個尋找過程罷!
    [緊張大師-小女人回覆05/24/2013 10:49:43]當然,但我那位朋友換話快過乜,我都無咁好氣啦.
    [版主回覆05/22/2013 21:00:27]約 10 分鐘步程啦!
    Lesbian 我就唔知咁多喇,不過都應該唔係個個都係咁嘅,免得一竹高打一船人!
    [緊張大師-小女人回覆05/22/2013 08:01:03]咁你去望海觀音遠嗎?我沒有Gay men只有一班女同性戀的朋友,她們全班都係女性,我認識了一位點知她係同性戀,又介紹女友比我識,識下識下成班.....我唔反對但我覺得她們換女友換得太快....
    [版主回覆05/21/2013 16:17:13]我咪就係行出去海灘個望海觀音度浴佛之嘛!嗰度係屬於佛教青年協會管理,所以每年佛誕早上暢懷法師會入嚟主持浴佛儀式,但近幾年我無一早出去,所以唔知法師仲有冇入嚟。
    睇嚟妳身邊真係無乜 gay friend 喎!Gay men 不嬲都係公認超細心,有時更勝女人!我由細到大,老師、同學、長輩、朋友都係咁話我,連我媽咪都話我處事仲細心過佢,所以佢臨走時都話唔會擔心我生活、處事,會好放心,只係怕我接受唔到,心情久久放唔低!
    [緊張大師-小女人回覆05/19/2013 14:11:23]你去邊到浴佛架,我本想去萬佛寺,但早上才下雨,路又斜才決定唔去,明年我完全康復啦,其實你好細心,好過好多女仕.
    [版主回覆05/18/2013 18:59:41]下年啦,下年搵埋妳一齊去浴佛好唔好呀?其實原本我有個 friend 話入嚟探我,順便陪我一齊去浴佛,點知病鬼咗,嚟唔到,所以咪一個人去囉!
    係呀,我次次去嚫花墟買花都行勻哂成個花墟,睇到最啱價先買。
    無緊要啦,有心就得!

    回覆刪除