咖啡慕斯蛋糕Coffee Mousse Cake

        整呢個 mousse cake 真係多災多難，足足整咗五次先至完全成功，連呢篇 blog 都要分開 4 次嚟 upload，真係死得！！

        其實上年已經開始整，當時都完全無諗過失敗呢兩個字，皆因個 coffee mousse 其實係再之前已經整過嘅榛子咖啡慕斯，嗰次都係一整已經成功，完全無失誤，點知到整呢個蛋糕時，硬係唔係好成形，我知道應該係喺凝固方面出問題，於是隔無耐再整多次，呢次醒喇，將魚膠粉用量加倍，肯定無衰啦，最多最係個 texture 比較實淨啫，點知情況都係一樣！後尾做 "賽後檢討"，搵吓究竟係咩出事，但諗咗好耐，材料份量跟步驟都完全正確，都真係唔知發生咩事，點知諗吓諗吓，醒起放雪櫃嗰包應該唔係魚膠粉，而係用剩咗嘅啫喱粉嚟㗎！！！ 因為無用太耐，老人癡呆太嚴重嘅我，完全唔記得咗！

        之後已經係冬天，所以我無再整，直到近排熱氣開始熱，我又諗番起佢，因為其實個 mousse base 真係好食，星期五嗰日又試嚟過，今次肯定係用魚膠粉，唔會再衰喇啩，點知自己又多多事幹，成日都諗住用 Italian meringue 比用 French meringue 消毒效果好好多，食得放心啲，所以今次就煮熱糖漿去整 meringue，但係可能因為無打 cream 太耐，個 cream 打得唔太好，望落好似有少少打過龍，不過情況唔係太嚴重，所以照樣繼續做，到加入 meringue 時果然出事，即刻油水分離，攪到成盆 mousse 變成豆腐花咁樣，睇見都唔開胃，即係倒哂落坑渠，重新再做一次！因為我一向都好怕浪費食材嘛，所以呢次好小心咁去做每個步驟，meringue 整得好綿密、咖啡蛋黃漿混合魚膠粉溶液又超順滑，無起粒，cream 又打得啱啱好，諗住呢次掂硬啦，點知一加入 meringue 都係油水分離，天呀！！！  唉咗一聲，唞咗一啖大氣之後，無奈又係請坑渠 "品嘗"！！

        到星期五放工返到嚟，心心不忿，都係再整多次，畢竟個餅底同海綿蛋糕已經整好咗，唔通你叫我就咁食咗佢咩！今次真係唔好攪咁多嘢喇，老老實實跟足 Margaret 個方法做罷，我唔想再倒嘢喇，新開一盒 cream 已經倒咗 200 克喇！！卒之咪要咁足先至成功囉，真係抓哂頭都唔知發生咩事！    

朱古力海綿蛋糕

材料：
低筋麵粉      17 克
可可粉          8 克
雞蛋             1 隻
糖                 25 克
橄欖油          6 克

- 先將粉類過篩 3 次；雞蛋加糖打發至 9 成企身蛋糊。

- 加入粉類，用膠刮輕手將所有材料拌勻。

- 先勺起少部份麵糊與橄欖油混合，再倒回麵糊內拌勻。

- 將麵糊倒入已墊牛油紙嘅模內，於枱面輕敲數下釋出較大氣泡。

- 放入已預熱至 170 ℃ 嘅焗爐內，焗約 15 – 18 分鐘。

- 出爐後立即倒扣攤凍，之後將牛油紙撕去，圓形底紙放回模內。

- 將蛋糕外圍切走約 5 毫米闊，表面切平，備用。

 

 

餅底

材料：

消化餅      40 克
橄欖油      20 克

- 將餅乾放入膠袋內，用手捏碎成麵包糠狀。

- 餅碎倒入碗內，加油均勻混合。

- 將餅碎平均鋪於模內，然後用匙羹背輕輕壓實。

- 放入冰格雪至硬身。


咖啡慕斯

材料：
雞蛋                 1 隻
糖                    20 克
魚膠粉             1/2 茶匙
熱水                 2 茶匙
咖啡粉             1 茶匙
咖啡酒             1 茶匙
咖啡濃縮液      1 茶匙
淡忌廉             100 克 

- 打開雞蛋，將蛋白同蛋黃分開；魚膠粉逐少加入熱水內，邊加邊攪拌，然後座熱水
  溶解。

- 咖啡粉加 1 茶匙熱水溶解，再混合咖啡酒及咖啡濃縮液。

- 蛋白用電動打蛋器打至起泡，之後將糖分 3 次加入，並座熱水打成 6 成企身蛋白霜。

- 蛋黃加入咖啡溶液混合物內，座熱水打至顏色轉淡及企身。

- 將魚膠溶液倒入咖啡蛋黃漿內，拌勻之後繼續座熱水保溫。

- 淡忌廉打至 6 成企身後，與咖啡蛋黃漿混合，然後再將蛋白霜分次拌入成咖啡慕斯。

蛋糕咖啡液

材料：
咖啡粉      1/2 茶匙
熱水         1/2 茶匙
咖啡酒      少許

- 咖啡粉用熱水溶解後再與咖啡酒混合即成

組合

- 將蛋糕咖啡液逐少掃上蛋糕表面，然後將蛋糕放上餅底上。

- 倒入咖啡慕斯，之後將蛋糕模於枱上輕敲，釋出較大氣泡。

- 放入冰格雪約 6 個鐘至完全硬身。

- 拎出慕斯，用風筒或火槍於蛋糕模周圍略為加熱，然後脫模。

- 將慕斯蛋糕放回雪櫃內，解凍至可用刀切開即可。

以上材料份量可做直徑 11.5 厘米蛋糕一個。

 

 

整咖啡味嘅嘢都真係要用 espresso 至得，如果唔係的話，

真係一啲咖啡味都無！今次我就用咗呢隻  espresso

即溶咖啡粉嚟整，兩位小姐都一食就即刻食得出

咖啡味，而且近排都賣得特別平，呢款孖裝

都只係賣七、八十蚊咋，名符其實

平、靚、正！

 

 

 

 

 

 

難得見到 Winnie 呢個整 mousse 嘅熟手技工，當然要問清楚

佢究竟發生咩事，原來佢話如果用 Italian meringue

整的話，要先將蛋白霜同打起忌廉混合，之後

先再拌入其他材料！唉，又一次

從錯誤中學習喇！

用橄欖油嚟整餅底，既方便之餘，唔使

溶牛油，又可以食得健康啲！

 

 

 

 

 

 

Notes：
- 咖啡濃縮液做法見《自製咖啡濃縮液》。

- 蛋白霜打好之後，可先放入雪櫃保持冷凍，保持穩定性，避免消泡出水。
 

- 咖啡蛋黃液拌入魚膠溶液後繼續座熱水保溫，可減低與打起忌廉混合時因溫差而

   即凝固成塊。

- 蛋糕表面掃上蛋糕咖啡液，能令蛋糕保持濕潤。