泰式酸辣雜菜湯

        前排睇番啲食譜剪報時，睇到 Bonnie Yves 好耐之前嘅食譜，佢呢次唔係教整果醬，而係教大家煮個泰式湯水，見佢個味道酸酸辣辣，應該會幾醒胃，而且我又未用過阿參呢樣食材，所以都幾有興趣一試。參考咗Bonnie 個基本做法，再加上自己嘅 idea 同選料，好容易就煮到喇！

        之前睇到肥媽個電視節目話喺灣仔街市有檔專賣泰國食材，對我嚟講真係一個天大喜訊，因為我每個禮拜都可以經過灣仔，咁就唔使去到九龍城都可以買到啦！檔口所賣嘅嘢都算好齊，價錢平唔平我就真係唔太清楚喇，但起碼都叫做有個地方俾我去買囉，你知啦，啲新鮮嘅東南亞食材及香料真係唔係到處都有得賣，淨係金不換同紅辣椒都好難搵，如果吓吓都話要去到九龍城買的話，我呢個屯門人打埋車費上去，都幾重皮囉！

 

材料：
甘筍
四季豆
泰國青圓茄
番茄
香茅        2 枝
南薑        1 小塊
辣椒乾    適量
乾蔥頭     2 粒
阿參醬    約 1 湯匙
清雞湯    300 毫升
清水        300 毫升

 

- 甘筍刨皮後切細件；四季豆洗淨後摘去兩邊粗纖維，然後切段。

- 青圓茄同番茄洗乾淨、去蒂，切件；香茅撕去最外層，之後用刀拍鬆、切段。

- 南薑去皮後切片；辣椒乾洗淨、切細；乾蔥頭去衣、切片；阿參醬加小量熱水，用叉
  鬆開拌勻。

- 將清雞湯及水倒入煲內，加入甘筍、香茅、南薑同辣椒乾，煲滾後轉中慢火煮至甘筍
  半腍。

- 之後加入乾蔥片，煲 2 分鐘，將其餘蔬菜料加入煮熟。

- 最後將阿參醬加入，攪拌均勻後落鹽調味。

 

喺灣仔街市嗰個檔口買咗袋勁大粒嘅乾蔥頭，
粒粒都有成個蒜頭咁大，我返到屋企先諗，
呢包會唔會係迷你紫洋蔥呢！

 

 

 

阿參其實係一種果實，又叫做酸子，亦即係用
嚟整喼汁嘅羅望子，味道都幾酸！

味道唔錯喎，飲完之後真係會好開胃，唔怕無胃口食嘢呀！

一個人食飯，簡簡單單就已經有湯又有餸喇！

Notes：
- 蔬菜用料可因應自己喜好選擇。

 

- 因阿參醬比較酸，所以最好試過味後再決定用量。