焦糖蘋果麵包布甸 Caramel Apple Bread Pudding

        麵包布甸都唔係第一次整，之前都已經整過好多次，不過今次就試吓加入焦糖蘋果，同埋參考咗 blog 友 Allie 嘅做法，唔落 cream 落去整，而我自己就更加健康，連牛奶都用水代替埋。

 

        呢個布甸可以話係一個極之環保嘅甜品，點解咁講？因為可以一次過清咗啲隔夜麵包同供過佛嘅蘋果哦！
 
 
 

 

材料：
蘋果                   1 個
糖                       3 湯匙
檸檬汁                1/2 茶匙
冧酒                   少許
厚麵包                1 塊
雞蛋                    2 隻
牛奶                    150 毫升
雲呢嗱濃縮液      適量
檸檬皮茸             1 個檸檬份量

- 蘋果去皮去芯，切細粒。

- 燒熱油，加入 2 湯匙糖，不斷兜炒至顏色轉變成淡啡色。

- 加入蘋果拌勻焦糖，灒酒，之後倒入檸檬汁。

- 繼續兜炒至蘋果軟身，表面呈金黃色，盛起攤凍。

- 麵包切成細粒；雞蛋拂打成蛋液，加水、雲呢嗱濃縮液及剩餘 1 湯匙糖拌勻成
  布甸液。

- 焗盅內薄薄掃上一層油，將蘋果粒及麵包粒放入。

- 倒入布甸液，再灑上檸檬皮茸。

- 將焗盅放上焗盤，倒水入盤內，放入已預熱至 180 ℃ 嘅焗爐內，焗約 30 分鐘至
  布甸液熟透。

以上材料份量可做布甸 3 盅。

 
 

無落 cream 整嘅布甸入口比較清爽，感覺無咁滯。

可能因為我食得比較甜，覺得個布甸無乜甜味，

布甸液可能要落夠 2 湯匙糖先啱我口味。