原味鬆餅食譜 Basic Muffin Recipe

        如果你係由 Yahoo Blog 睇到依家 Google Blog 的話，可能你都會留意到我都會經常整 muffin，而且都曾經整過好多款式，但其實都係萬變不離其中，我一直大部份時間都係 base on 同一個 muffin recipe，然後再加加減減，又或者更改部份材料而做出不同口味。

 

        上次 Winnie 試過個焦糖蘋果鬆餅之後，佢都話味道唔錯，連一直都唔多鍾意食 muffin嘅佢都專登打電話問我點解個 blog 搵唔到個食譜，咁之唔係因為我懶無寫囉，哈哈！！

 

        所以我就諗，不如將我一直用開嘅 basic muffin recipe 同大家分享啦，之後大家就可以 base on 呢個 recipe 嚟做出自己喜愛嘅口味哦！
 

 

材料：
低筋麵粉      250 克
泡打粉          2 茶匙
鹽                 1/2 茶匙
糖                 80 克
雞蛋              2 隻
橄欖油          90 克
乳酪             100 克

- 粉類過篩 3 次；將所有乾料放入兜內混合好；全部濕料攪拌均勻。

- 將濕料倒入乾料內，用膠刮快手攪拌均勻。

- 將麵糊勺入模內，放入已預熱至 200 ℃ 嘅焗爐內，焗約 20 分鐘即成。

 
以上材料份量可做鬆餅 10 個。

 

 

呢次我就加咗 pecan 果仁同糖漬雜果皮落去整。

呢個 basic recipe 真係唔錯㗎，成品做出嚟

一定夠鬆，而且表面仲爆得好靚㖭！

Notes：
- 食譜中嘅乳酪可以改用牛奶、水或其他果汁，但用乳酪係最理想，因為酸性物質會有

  助泡打粉發揮膨鬆作用，令鬆餅麵糊發得更高更鬆，所以 buttermilk 亦都係唔錯嘅選擇。

- 混合乾濕材料時，必須將濕材料倒入乾材料內混合，我自己就試過幾次將步驟掉轉，

  乾材料倒入濕材料內，效果唔多理想，質地唔夠鬆，比較實。

- 用膠刮攪拌混合材料時，必須快手及輕手，毋需完全混合至一點點粉粒都見唔到，因

  為麵糊攪得太耐的話就會產生筋性，成品質地就唔會鬆軟。

- 大家亦可用電動打蛋器嚟攪拌麵糊，比較容易做到鬆軟效果，因為打蛋器轉動速度比

  人手快，可以縮短攪拌時間，以免產生筋性，當所有材料大致混合好就要即刻停機。