初試年糕製作

        一個人食嘢嘅口味真係會隨年齡改變，記得好細個時，有次同家人一齊去上海菜館食飯，媽咪叫咗碟炒年糕，嗰次係我第一次食呢樣嘢，感覺好難食，好難吞得落肚，自此之後都唔肯再食。直到唔知幾時，再試多次之後，突然之間又覺得好好食，特別鍾意佢煙煙韌韌嘅口感，所以自從自己要煮飯開始，都會間中整嚟食，特別鍾意食韓式年糕，因為辣嘛！

       其實年糕都唔平，無論係中式年糕定係韓式年糕都賣得好貴，我成日都覺得，一堆咁嘅粉糰點解賣咁貴，如果自己識整的話就肯定平好多，於是就上網試吓搵唔搵到食譜。喺網上都搵到好幾個年糕製作方法，但其實都係大同小異，今次試整嘅方法係我將幾個食譜綜合而成，成品口感都唔差，不過就覺得個煙韌度差少少，下次試試將糯米粉同粘米粉比例改一改，睇吓會唔會好啲先！

 

 

熟粉糰

材料：
糯米粉      40 克
水             約 30 毫升

- 材料拌勻成粉糰，用手搓圓後輕輕壓平。

- 將粉糰放入滾水內煮至浮起，盛起瀝乾水份，備用。

 

生粉糰

材料：
糯米粉      100 克
粘米粉      160 克
水             約 140 克
熟粉糰

- 將粉料混合好，熟粉糰剪成細件加入粉料內。

- 邊搓邊加水，直至搓揉成糰。

- 切出一小嚿粉糰，用兩手掌心慢慢搓成長條狀，之後切成細段。

 

 

 

- 牛油紙打孔後舖入蒸鍋內，放上粉糰條，用大火蒸 20 分鐘。
 
 
 
 

 

- 將蒸熟粉糰放上防黏蓆上攤凍。
 

 

雖然呢個唔係韓式年糕做法，但因為之前整落嘅泡菜已經

醃咗好耐，味道變得越來越酸，我唔太鍾意食

太酸嘅泡菜，所以都係用韓式年糕

煮法，快手清埋啲泡菜。

 

 

Notes：
- 搓粉糰時切勿將水一次過倒入，需視粉糰濕度及黏度而調整用水量。

- 蒸粉糰時，粉糰條之間需留有足夠空間，因為蒸熟後會略為膨脹。

- 做好嘅年糕可以放入雪櫃或冰格保存。