沙茶茄子燜麵筋

        唔知大家有無聽過，沙茶醬其實係沙爹醬，只不過潮州話中 “爹” 呢個音係解作茶，潮州人飲茶叫做 “蓆爹” 嘛，所以將沙爹醬寫成沙茶醬。但係我覺得兩者個味道都幾唔同，一食落口已經分得出。
 
        今晚用咗沙茶醬嚟燜茄子同炸麵筋，兩樣食材都燜到入哂味，超正呀！！
 

 

 

材料：
茄子
京蔥
雞髀菇
炸麵筋
蒜蓉

 

調味料：
麵豉
沙茶醬
紹酒
鹽
糖
麻油
 

- 茄子洗淨後去蒂；京蔥洗乾淨，切去根部及深綠色部份；雞髀菇略洗，全部材料切粗片。

 

- 炸麵筋放滾水內汆水，瀝乾水份後一開二切半。

 

- 燒熱油，將京蔥及雞髀菇落鑊兜炒，灒酒，略炒片刻後盛起。

 

- 加入適量油爆香麵豉、沙茶醬及蒜蓉，加入茄子兜炒，灒酒。

 

- 倒入適量水煮滾，之後轉中慢火將茄子煮至半熟。

 

- 麵筋落鑊，與茄子一齊煮至八成熟。

 

- 將京蔥及雞髀菇回鑊，煮至京蔥稍為軟身後加鹽、糖調味。

 

- 最後灑上少許麻油，兜勻後即可上碟。

材料入哂味的話，即係代表味道相對比較濃，

剛好清甜爽口嘅京蔥同雞髀菇就

可以平衡一下整體味道。

 

 

 

 

 

 

原本將茄子泡油就可以保持到靚靚嘅紫色，但係呢個動作

我打死都唔會做，一來我成日都話之後都唔知

點處理鑊油好，二來就係好唔健康哦！

反正都係自己食咋嘛，唔需要色

水喇，最緊要係食得健康！

 

 

Notes：
- 將炸麵筋汆水可以去除多餘油份，但不可太耐，否則落鑊再煮時會變得過腍。