木瓜雙耳果仁湯

        一直以嚟我都多數係煲齋湯多過煲肉湯，因為我唔係食肉獸兼極之唔想處理生肉，二來就係唔知點解煲嚫肉湯都唔多有甜味，反而煲齋湯就次次都超甜！而最重要嘅係煲齋湯的話，無論事前事後嘅清洗工作都簡單好多，因為全無油脂，但煲肉湯就煩好多喇，起碼又要洗多個用嚟汆水嘅煲！

        正因為咁，即使我煲齋湯都好少會落果仁，除咗因為避免有油脂外，無落果仁煲出嚟啖湯會比較清甜，無咁 “濁”。前幾日睇肥媽個節目，見佢教用果仁煲齋湯，諗吓自己都真係好耐無落果仁喇，今次就加番腰果同合桃落去啦！
 
 

材料：
雪耳
黃耳
紅棗
冬菇
枝竹
無花果
紅蘿蔔
木瓜
腰果
合桃

- 雪耳、黃耳、紅棗、冬菇同枝竹用清水浸發、洗乾淨，雪耳同黃耳汆水，備用。

- 無花果沖洗乾淨後開邊；紅蘿蔔同木瓜去皮、去瓤，之後切件；果仁略沖洗。

 

- 凍水落料煲湯，煲好後加鹽調味。
 
 

雖然用比較熟嘅木瓜嚟煲湯會比較甜，但我自己就好怕

聞到熟木瓜嗰種味道，對我嚟講係一 “朕” 臭味，

好難頂！所以寧願買個青木瓜煲湯。