香草番茄全麥麵包 Tomato & Herbs Whole Wheat Bread

        仙姐本《天然麵包香》買咗咁耐，都只係跟食譜整過一次包，之後一直都無再整喇，皆因嗰陣未有麵包機，只係用部 food processor 搓麵糰，但 17 小時中種原來係濕得好緊要，所以攪攪吓個麵糰就捲咗入部主機裡面，之後要善後好耐，自此之後就驚咗唔敢再整喇！依家買咗部麵包機之後，可以試試再整。         

        食譜裡面個油浸半乾番茄麵包最吸引我，因為記得好耐之前 Rachel 個 studio 攪 open day 時，買過仙姐呢個麵包嚟食，超好味，所以一定要試吓自己整！我今次就將個食譜改咗少少嘢，將部份高筋粉改成全麥粉，橄欖油就用浸番茄乾油代替，仲加埋 oregano 落去整㖭！。

冷藏中種

材料：
高筋麵粉               205 克
水                         約 118 毫升
即用酵母               2.5 克
鹽                          3 克

- 將材料放入麵包機內，用【麵包麵糰】模式搓成麵糰。

- 麵糰放入膠盒內，用保鮮紙包好或加蓋放入雪櫃，低溫發酵最少 17 個鐘。

 

主麵糰

材料：
油浸番茄乾            30 克
高筋麵粉               18 克
全麥粉                   70 克
牛至 (oregano)      適量
鹽                          2 克
糖                          35 克
蜂蜜                      10 克
蛋液                      20 克
罐頭番茄肉           45 克
茄膏                      60 克
即用酵母               1 克
浸番茄油               15 克

- 將中種剪成細件；番茄乾切細粒。

- 除番茄乾外，將所有材料放入麵包機內，用【麵包麵糰】模式搓成麵糰。

- 加入番茄乾均勻混合後，拎出麵糰滾圓。

- 放入已灑粉嘅兜內，用保鮮紙封好，發酵 45 - 60 分鐘。

- 麵糰排氣後平均分割成 4 份，分別滾圓，靜置鬆弛 20 分鐘。

- 將麵糰再次排氣，壓扁後將左右兩邊向內摺入，再對摺並捏緊收口，做成欖核形狀。

- 將欖核兩端輕輕對摺形成凹字形狀，放入多士模內發酵至 8 分滿。

- 麵糰表面掃上蛋液 (份量以外)，放入已預熱至 180 ℃ 嘅焗爐內，焗約 30 分鐘。

- 出爐後立即脫模，放上架上攤凍。 

以上材料份量可做麵包多士 1 條。

 

個麵糰好濕，要不斷落手粉，唔知關唔關天氣潮濕呢？

非常之黏手，所以即使整好定形，當搬到

多士模就變得好樣衰！

 

掃咗蛋液先入爐焗，顏色特別靚哦！

 

是日的第二餐：蔬菜三文治、炒滑蛋

& 煎雞尾腸，再加一杯即磨咖啡。

 

 

Notes：
- 攪拌材料時若發現麵糰太濕、太軟身而未能成糰的話，可酌量加入少量高筋麵粉。

- 油浸番茄乾製作方法，請參閱《油浸番茄乾》。

 

- 冷藏中種必須包好密封，避免於雪櫃內被抽乾水份，最長可放 72 個鐘發酵。