又執到筍嘢

        話說上次「AEON」會員特價日，去到屯門店想賣嗰樣無嗰樣，買乜無乜，激到爆，但原來又係塞翁失馬哦！禮拜六嗰日早咗到銅鑼灣，又有排都未到時間教琴，於是又走咗去超市打個 round 打發時間。

        味噌係我雪櫃裡面嘅長期住客，最鍾意用去嚟做湯底，無時間煲湯時就大派用場，買些少蔬菜料滾湯，最後加入少量味噌，即刻有啖湯飲。煮麵時又可以用佢嚟做湯底，好過用味精啦！中間第二餐我自己好多時都會煮麵食，而且食得好簡單、好求其，通常都係淨麵一碗，唔會有其他材料，煮好麵後就加入味噌同味醂調味做湯底，又快又方便！

 

        呢隻鰹魚味噌我最鍾意，因為如果淨用白味噌的話，其實個湯煮出嚟唔多好味，但只要加一細羹鰹魚味噌落去，當堂唔同哂，鮮味好多呢！原價賣開 $22.9，會員特價日 9 折後就係 $20.6，但上次買唔到，個貨架 "吉" 哂！呢日就見到賣 $8，我梗係唔多相信自己對老花眼啦，於是拎去問個執貨阿姐，佢用部機 “嘟” 完之後都話係賣 $8 咋，阿姐話因為就快到期，而且存貨量多喎，所以咪要平賣速銷囉！佢話其實過咗期都一樣食得，超抵買咁話。

        係囉，味噌反正都係發酵食品，邊鬼度會有過期至得㗎，發酵時間越耐，味道就越香醇，今次真係執到筍嘢喇！