2014年5月14日星期三

健康飲食

        其實我自己都唔算係食得好健康,只係少肉多菜,奉行三低一高嘅飲食,但唔知點解,身邊個個人都覺得我食得好健康,幾乎係不食人間煙火咁滯,可能因為見我都唔多鍾意食零食 ( 基本上次次入嚫「759」都係得個睇字,無嘢好買,空手出番嚟! )、唔飲汽水、唔飲凍嘢,又好少出街食啦!有時細細個嘅學生貪得意話請我食啲小食或零食,佢哋媽咪就會話:「關 sir 食得好健康,唔食呢啲嘢㗎!」有次老表 Lily Winnie 分別見到我煮即食麵都即刻覺得好出奇、好驚訝,點解我會唔食即食麵!?講真,自己都有整包餅西點食,又因為止頭痛會飲咖啡,健康得去邊呀!!不過咁,總好過買街外食物嘅!

        最近上網睇番香港電台個電視節目《緣來好食得》,其中一集叫做《我與西瓜和火龍果的三角戀》,裡面有介紹到周兆祥博士主張嘅 食生,即係大部份食物都唔會經過高溫處理,盡可能生食蔬果以保留裡面嘅酵素,其中最得意嘅係將個翠玉瓜用一個特製機器刨成長絲當麵條食。呢種食法聽落都好健康,但生食瓜菜都應該幾寒涼,長期咁食,我估我身體應該未必接受得到囉!講開周兆祥博士,佢成日都推崇健康飲食、食素、以至依家嘅食生,本來係件好事,但我個人就覺得,以佢個咁嘅 outlook,真係有啲唔係好夠說服力囉,俾人以為食素、食齋嘅人就會好似佢咁又瘦、又黃、又黑!!可能會嚇怕好多有心人!
 



剛出爐嘅燕麥鄉村包。
 

 



今日仲整咗沙律,用上番薯、醃酸紅蘿蔔絲、
紅腰豆、三角豆同粟米粒,淋上千島醬就食得!
 

 
 

 
見到呢餐,係咪又覺得好齋、好寡呢,哈哈哈哈!^^
 
 
 

13 則留言:

  1. 翠玉瓜可以當沙律食, 我試過。依家我午餐都食生蔬菜 (no sauce)。一星期三四餐。

    回覆刪除
  2. 我都好少食零食,你哩個餐我中意~~

    回覆刪除
    回覆
    1. 真係?好難得有人唔嫌太過 "齋" 呀!

      刪除
  3. 講真真系好齊好寡呀…唔岩我呢個食肉獸~哈哈!

    回覆刪除
    回覆
    1. 睇得妳個 blog 耐,我都好清楚知道我無可能同妳同枱食飯,呵呵!

      刪除
  4. 越睇得多親朋戚友嘅結果, 越覺得健康不健康, 係DNA決定大於一切, 飲食的作用, 除非太過份, 和健康關係, 有 ...... 但係唔大囉. 所以覺得, 想食就去食啦, 人生為乜. 有d人話我食得好清喎, 其實只係因為, 我喜歡食清淡啫.

    回覆刪除
    回覆
    1. 係囉,唔好過份就得,間唔中食吓垃圾都唔會死嘅!

      我成日都話,食煙嘅唔係肺癌死,飲酒嘅唔係肝癌死,飲食健康均衡兼做運動嘅就生 cancer 死!

      刪除
  5. 係759, 我只會買醬料,意粉同飲品

    回覆刪除
    回覆
    1. 我都只係買過一次意粉,佢啲供應唔穩定,唔係次次都買得到同一貨品。

      刪除