朱古力麻糬波波 Chocolate Pontikege

        呢排都唔知攪乜鬼，學哂明仔咁勁鍾意食朱古力㖭！ 繼上次整完麻辣朱古力之後，今日輪到第二擊，整咗我嘅心頭好 — 麻糬波波。

        睇番啲舊 blog，原來對上一次整麻糬波波已經係年半前嘅事喇！上次整嗰個係黑芝麻麻糬波波，不過我覺得嗰個食譜整出嚟嘅成品比較乾身，可能就係因為咁，無咩興趣再整第二次。直到最近，睇到《頭條日報》刊登咗韋太本《小食多滋味》裡面個朱古力麻糬波波食譜，心郁郁又想試吓整，趁今日 dayoff 得閒，咁就整嚟試吓啦！

材料：
糯米粉                  120 克
木薯粉                  15 克
可可粉                  5 克
鹽                          1/4 茶匙
糖                          30 克
橄欖油                  30 克
雞蛋                      1 隻
水                          3 湯匙
入爐朱古力粒      40 克

- 將所有粉類混合好、過篩；雞蛋拂打成蛋液。

- 將鹽同糖與粉類拌勻之後，加入油及蛋液，拌勻。

- 水逐少加入、攪拌均勻，加入朱古力粒後用手搓成糰。

- 將粉糰分成細份、搓圓，之後放上已鋪入爐紙嘅烤盤上。

- 放入已預熱至 180 °C 嘅焗爐內焗約 20 分鐘即成。

以上材料份量可做直徑 5 厘米麻糬波波約 8 個。

食譜出自韋太嘅《小食多滋味》。

粒粒都焗到脹卜卜，仲有好香濃嘅朱古力味㖭！

 

味道唔錯呀！今次比起上次個黑芝麻麻糬波波
較為濕潤， 外面煙韌，裡面較軟身。

 

 

        話就話今次比較濕潤，但始終都係未及「A1 Bakery」嗰啲咁軟身，睇佢個樣似係用唧袋唧出嚟咁款，可能就係因為水份材料多，唔能夠直接搓成糰，亦因為咁而比較軟身，下次試試加多少少水份，睇吓有冇幫助先！

 

 

 

Notes：

- 材料中嘅橄欖油同水，原食譜為牛油溶液及鮮奶。

 

- 由於糯米粉同木薯粉本身已經非常幼細，所以過篩時用匙羹喺篩內攪拌即可，
  如果用篩麵粉嘅手法，粉類會好容易散佈喺空氣之中。

- 粉糰嘅大細可隨意搓成，但要注意入爐烘焗嘅時間需略作更改。