我是世界上最幸福的人………

        噚晚睇電視時，無意中睇到中央電視台重播一個中俄跨國尋親節目《等著我》，真係好感人，可惜我只係中段先開始睇，不過唔緊要，因為有有心人已經將整個節目掟咗上 Youtube，有時間可以慢慢睇番。

        節目主要係幫中國人同俄羅斯人尋找失去聯絡嘅親朋戚友，我噚晚所睇到嘅片段，有子女尋父母、有未拍過拖嘅 "情侶" 尋找失去聯絡嘅另一半、有交流生尋找當年一齊讀書嘅校友、亦有當年曾經短暫時間係 "孤兒"  嘅去尋找奶媽。當中每個故事都的確係好感人，尤其係當雙方同台見面時，真係好激動，更會喜極而泣。

        呢個 case 係一位中年男仕尋找媽咪，當年佢要同家姐跟媽咪一齊去蘇聯，點知中途爸爸趕到，將佢帶走，從此就跟媽咪、家姐分開，過往媽咪喺屋企坐開嘅椅一直留空，事主一直等媽咪返嚟坐，點知一等就等咗五十五年，當年六歲嘅小男孩如今已是一名白髮中年人，幸好，俄羅斯方面真係幫佢搵得番媽咪，當佢媽咪上台同佢相認時十分激動，就連中央電視台嘅主持人董卿都話，雖然佢已經係一個白髮中年男子，但當見番媽咪之後，都亦然係一個小孩咁立即跪下，攬住媽咪雙腳不斷咁喊，可想而知，當事人對母親嘅思念係幾咁深！

 

        而呢個 case 就係一位中年女仕，父親係中國人，母親係蘇聯人。事主當年一歲大時，外婆帶佢返烏克蘭探親，點知因為一啲事故返唔到中國，從此就與父母相隔兩地，外婆臨終時交低一些文件，係證明佢同父母嘅關係及當年嘅出生地，事主就係拎住呢啲文件搵俄羅斯電台人員幫手尋親，亦都係好好彩，幫佢搵得番媽咪，但原來爸爸就等唔到呢一刻，早些日子已經離開咗，當媽咪知道咗女兒嘅下落之後，同樣十分激動，泣不成聲，大家上台相認時，當然亦非常激動，完全唔識講嘢，當事人就連企喺隔離果兩個人係邊個都唔知，直到媽咪向她介紹，先知道原來係自己嘅親生細佬妹！

 

        跟住呢個 case 就仲經典，當年嘅一個中國青年相識了一位熱愛中國文化嘅蘇聯少女筆友，不斷書信來往，慢慢由筆友發展成情侶，但由始至終都未見過面，後來，少女嘅爸爸發現到書信字裡行間有著愛情字句，於是就將中國青年寄俾佢個女嘅信通通收起，從此兩人失去聯絡。事主一直以來都喺度等緊呢位少女，直到五十多歲時先成家立室。現年已經七十六歲嘅 "青年" 覺得不明不白，為解開心中嘅謎，所以就請電視台幫手搵果位少女，當然，又係一個成功嘅 case 啦！不過，當事主喺台上見到對方之後，覺得唔似係事實，仲話果位老婦個樣真係生得好似當年果位少女，主持人董卿就即刻話：「咩叫做生得好似呀，佢根本就係果位少女，唔通你唔相信嗎？」於是 "青年" 就問咗對方幾個問題，果位老婦全部答中哂，佢先至真係相信眼前就係當年嘅筆友。

        雖然我講嘅呢三個 case 都係成功幫到事主，但唔係每一個 case 都成功，好似果位搵奶媽嘅女仕就暫未有回音，希望佢可以早日達成心願！

       感性嘅我，當然係一路睇就一路喊啦，就連主持人及兩國嘅現場觀眾，男女老幼都不停流淚，因為大部份嘅個案都已經係事隔五十幾年，咁樣都能夠搵得番自己想搵嘅人，真係絕對係奇蹟！難怪多位事主都不約而同咁話，自己係世界上最幸福嘅人！

        老實講，如果香港都有呢個媒體平台，我都一定會申請，希望可以幫我搵得番媽咪，但係，我都好清楚知道，我可以跪低攬住媽咪雙腳做個 "世界上最幸福嘅人"，根本係無可能 ………