紅豆朱古力蛋糕 Azuki Chocolate Cake

        放假喺屋企無嘢好做，老竇又上咗深圳幫個朋友整嘢，所以今晚連飯都唔駛煮，無聊得滯，整完朱古力麻糬波波之後，繼續朱古力第三擊，今次輪到整洋菓子喇！

        其實呢個紅豆朱古力蛋糕想整好耐 o架喇，一直都係喺我個 To Do List 入面高據頭幾位 o架，連紅豆餡都已經一早整好哂放定喺冰格度，但係因為之前有啲係必定要做，又或者係突然間要搶先整咗先，所以一直拖到依家先輪到佢出場囉！

 

材料：
朱古力              80 克
橄欖油              70 克
雞蛋                  4 隻
糖                      60 克
水                      30 毫升

冧酒                  1 湯匙

日式紅豆餡      120 克
低筋麵粉          1 湯匙
可可粉              1 1/2 湯匙
肉桂粉              1/4 茶匙
防潮糖霜          適量

- 朱古力溶化成朱古力漿；雞蛋分開蛋白同蛋黃；粉類過篩 3 次。

- 橄欖油與朱古力漿拌勻；蛋黃加 20 克糖，用打蛋器打至稠身，之後將兩者混
  合。

- 加入水同冧酒，拌勻，之後再拌入紅豆餡。

- 將粉類篩入混合物內，用打蛋器攪拌均勻，備用。

- 將剩餘嘅 40 克糖分 3 次加入蛋白內，用電動打蛋器打至 8 成企身。

- 先將 1/3 份蛋白霜拌入混合物內，拌勻後將其餘蛋白霜拌入。

- 將混合好嘅麵糊倒入模內，然後放上烤盤上，並於盤內倒入熱水。

- 放入已預熱至 160 °C 嘅焗爐內焗 45 分鐘，出爐後將蛋糕脫模，放上架上攤
  凍。

- 蛋糕攤凍後，灑上糖霜，即可切件享用。

以上材料份量可做直徑 18 厘米蛋糕 1 個。

食譜出自福田淳子嘅《我愛和風洋菓子》。

睇食譜時已經覺得呢個係和風版嘅經典朱古力蛋糕，
估唔到焗完出嚟都一樣有少少裂面兼收腰。

 

可能因為係用蒸氣焗，所以成品好濕潤，但又唔會好似經典朱古力
蛋糕咁濕，反而更加好，食落唔會覺得好 "漏"，而且味道
層次豐富，真係食得出朱古力、紅豆同冧酒味道，
但肉桂味就唔係好食到喇！
 

Notes：

- 小弟將原食譜嘅牛油溶液及牛奶分別改為橄欖油及水。

- 如果用甩底模焗蛋糕的話，記得要用錫紙穩陣包好底部，以防熱水滲入麵糊內。

- 當熱水就快焗乾時，記得添加熱水。