黃豆粉紅豆雪芳蛋糕 Kinako & Azuki Chiffon

       前幾日整過黃豆粉鬆餅後，今日都係繼續用黃豆粉整蛋糕，不過今次唔係整 muffin 喇，而係輪到整雪芳蛋糕。

        其實今日整呢個蛋糕係有目的嘅，因為聽日係伯伯嘅生日，而佢今年嘅生日應該係成世人最唔開心嘅一個生日，因為要喺醫院渡過囉！平時喺醫院都 "無啖好食"，所以我特登整個蛋糕俾佢，都叫做象徵式有個生日蛋糕，同埋唔駛齋食醫院飯餸咁慘！

材料：
蛋白              110克
黃糖              40克
檸檬汁          1/4 茶匙
粟粉              5克
蛋黃              40克
熱水              36克
植物油          36克
低筋麵粉      50克
黃豆粉          10克
紅豆餡          70克

以上材料份量可做 17cm 雪芳蛋糕一個。

食譜係參考咗 Ozawo Noriko 嘅《戚楓蛋糕秘法傳授》。

 

- 先將麵粉過篩 3 次；黃豆粉用白鑊炒至焦黃色。

匙羹裝住嘅係未炒過嘅黃豆粉，左邊焦黃色果啲係已經炒好咗
嘅黃豆粉。

 

- 用電動打蛋器以低速將蛋白打至起泡，之後加入粟粉及檸檬汁，用高速打至
  企身，做成蛋白霜。

- 蛋黃同糖用打蛋器拌勻，然後加入水及油混合好。

- 篩入麵粉同黃豆粉，拌勻成麵糊，然後輕手拌入紅豆餡。

- 蛋白霜分次拌入麵糊內，以切拌方式輕手拌勻所有材料。

- 將已拌好嘅麵糊倒入雪芳模內，然後放入已預熱 160 °C 嘅焗爐內焗約 25 分鐘
  至熟。

- 出爐後立即將蛋糕倒扣放涼，攤凍後脫模。

 

3 個蛋糕出爐喇！ 嗯，乜睇落咁似貓頭鷹嘅！？

 

 

        圓形果個蛋糕就無食到，因為留俾伯伯嘛！我淨係食咗方形果個。可能因為方形呢個係最細嘅關係，所以外面焗過火，比較韌同嚡，但裡面一樣好濕潤、好鬆軟呢！我諗圓形果兩個應該無呢個問題，因為 size 比方形果隻大好多，焗嘅時間應該啱啱好。蛋糕有好濃紅豆味，但就唔係好覺有黃豆味，可能份量少啩，下次再整時可以落多少少。

        其實今日整呢個雪芳蛋糕係唔只跟一個食譜嚟做，而係綜合幾個食譜嘅 "集大成"！因為伯伯有糖尿病，唔可以食太多糖份，所以食譜裡面糖嘅份量係一定要減少，而且仲要改用黃糖，會無咁甜。另外，打蛋白時我又唔落糖，但無糖又可能會導致蛋白霜難打發及保持穩定性，所以要加入檸檬汁去打發，咁就需要參考另一個食譜先可以知道檸檬汁用量比例。落咗檸檬汁同粟粉後，蛋白不但容易打發咗，而且放咗好耐都無變軟，仲係好挺身，加上我又將打起咗嘅蛋白霜放番入雪櫃保持冷凍，所以即使打好蛋白霜之後先至打蛋黃同秤其他材料，蛋白霜都完全無走樣，依然夠挺身！以前為免蛋白霜消泡軟化，所以習慣都係先打蛋黃後打蛋白，咁樣中途一定要洗乾淨個打蛋器先可以再打蛋白，依家跟 Ozawo Noriko 嘅方法去做，就可以先打蛋白後打蛋黃，慳番洗少次打蛋器呀！

 

Notes：
- 如果唔想麻煩，可直接選用日式黃豆粉，因為本身已經炒過，所以顏色呈焦黃
  色。

- 根據第三個食譜，蛋黃係唔駛打至發白，否則就會失去蛋香味。

- 蛋白盡量保持冷凍，咁就比較容易打發。

- 根據 Ozawo Noriko 嘅食譜，如果蛋白霜變軟時，可以用打蛋器再次打發。

- 檸檬汁可用他他粉 ( cream of  tartar ) 代替。