紅豆煎餅 Chinese Fried Red Bean Cake

        今日呢個紅豆煎餅，其實係為咗 Lily 而整嘅。

        話說早前佢俾咗張剪報我，係一個食譜嚟嘅，佢話睇到幅相好似好好食咁，如是就剪低俾我，叫我有時間試吓整，咁我就應承佢，如果整咗就通知佢，俾佢試吓，睇吓係咪真係咁好食。

        淨係睇幅相都似模似樣，呃得吓人 o架，呵呵！

材料：
低筋麵粉      60克
中筋麵粉      240克
泡打粉          3克
糖                  30克
速溶酵母      4.5克
水                  160克
白油              6克
紅豆餡          250克

以上材料份量可做約 5 - 6 個煎餅。

食譜係嚟自 lovecook2.mysinablog.com。

 

- 先將糖溶喺水度，然後放入微波爐內 "叮" 約 30 秒至微暖，之後將小量糖水同酵
  母混合，拌勻備用。

- 將麵粉同泡打粉混合好，加入酵母糖水，拌勻，之後再逐少逐少將剩低嘅暖水加
  入，攪拌成麵糰。

- 麵糰搓成形後，加入白油搓勻，然後冚上保鮮紙，發酵 10 分鐘。

- 之後將麵糰搓至光滑，然後分成每個約 80 克重嘅小麵糰；紅豆餡就分成為約 50
  克一份。 

- 用擀麵棍將小麵糰擀成薄麵皮，包入紅豆餡，收口後將麵糰稍為擀扁。

- 包好餡後，將麵糰再次冚上保鮮紙，靜置 30 分鐘。

 

- 燒熱油，用慢火將麵糰煎約 10 分鐘至熟，兩面煎至金黃色就可以盛起。 

 

攪掂，可以上碟影相！係咪都幾吸引呢！

 

金玉其外呀！你哋睇，我啲包餡技術幾差勁，啲餡歪埋一邊呀！！

 

        每次做嚫包餡麵糰我都唔識收口，整嚟整去都埋唔到 "欄"，卒之咪攪到啲餡分佈唔平均囉！所以點解一開始我就話睇個樣都呃得吓人囉！睇嚟都要請教吓 Louisa 佢點樣將個流沙包收口先得喇。

Notes：
- 白油即係固體菜油，如果屋企無的話，可以用牛油代替。

- 根據原食譜，可用奶代替水加入麵糰。 

- 原食譜係用中式紅豆沙，但因為我之前整落啲日式紅豆餡，貪方便照用。

- 煎嘅時候，一定要用慢火煎，如果唔係，個紅豆餅就好易煎燶。

- 食譜提議，煎麵糰時可冚上鑊蓋半焗半煎。