麵豉排骨蒸南瓜

        今晚呢個餸唔難整，而且又好好味，算係我鍾意嘅菜式之一。首先，我係勁鍾意食南瓜囉，鍾意佢清甜嘅味道；其次就係排骨蒸出嚟嘅肉汁被南瓜吸引，所以南瓜就變得更加美味。

        其實，我今晚整呢個餸都係為咗試一試 Winnie 早前俾我嘅有機麵豉醬，佢話佢媽咪食過呢隻麵豉之後，就唔肯再買其他麵豉，因為呢隻有機麵豉好香濃。

 

不過，呢隻有機麵豉同傳統嘅中式麵豉唔係好同，好深色，反而
有啲似日本嘅赤味噌。

 

材料：
排骨 ( 腩排 )
南瓜
蔥花

醃料：
糖
豉油
麵豉
紹酒
粟粉
麻油

- 排骨洗乾淨、瀝乾水，用醃料依醃肉基本法醃好。

- 南瓜去皮、去瓤，洗淨後切大粒。

- 將南瓜鋪好喺碟上，之後再喺南瓜面放上醃好嘅排骨，就可以拎去蒸。

- 隔水蒸好後，灑上蔥花，再蒸多一分鐘就攪掂。