經典薄荷朱古力蛋糕 Gâteau classique au chocolat à la menthe

        突然發覺，原來近排好少用朱古力嚟整嘢食，無整咁耐，好掛住個經典朱古力蛋糕呀，真係好好味 o架，百吃不厭，好鍾意佢超濃郁嘅朱古力味，試過嘅朋友都讚不絕口。

        好，就整番個嚟歎吓先！ 不過今次比較特別，我特別用咗薄荷朱古力同薄荷酒嚟整呢個蛋糕。

 

材料：
薄荷朱古力      60克
牛油                 40克
蛋黃                 40克
蛋白                 80克
砂糖                 80克
低筋麵粉         10克
可可粉             30克
淡忌廉             30克
薄荷酒             1 湯匙
防潮糖霜         適量
薄荷葉             適量

- 牛油同朱古力放入微波爐內，以每次 "叮" 10 秒嚟溶解牛油同朱古力，之後拌勻，

  並重覆步驟直至所有牛油同朱古力完全溶化為止。

- 淡忌廉放入微波爐內 "叮" 約30秒，以加熱至人體體溫。

 

- 將其中 40 克糖加入蛋黃裡，坐熱水打至發白。

- 將朱古力牛油溶液、淡忌廉同薄荷酒一齊加入已打發好嘅蛋糊入面，混合好後再
  篩入麵粉同可可粉，拌勻。

- 蛋白打至起泡，然後分 3 次加埋剩低嘅糖繼續打發，直至蛋白打至企身成蛋白霜。

- 蛋白霜分 3 次加入麵糊中，拌勻。

- 將麵糊放入已預熱至 180°C 嘅焗爐內焗 25-30分鐘。

- 出爐後脫模攤凍。

- 最後灑上防潮糖霜，放上薄荷葉裝飾，完成。

以上材料份量可做一個 7 吋蛋糕。

食譜參考自 Vanlily 嘅 Banana Classic Chocolate Gateau。

今次用咗 Lindt 嘅薄荷黑朱古力同呢支 "古董" 葫蘆樽薄荷酒
嚟整呢個朱古力蛋糕呀！呢支酒可能大過我！

噢，出爐啦！今次焗得好成功噃，兩個都裂哂面、
收哂腰，仲裂到下陷㖭，yeah！

 

因為 Gordon 不嬲都鍾意食朱古力，所以今次特登
做多一個送俾佢同佢媽咪！

 

切開裡面，深色到乜都睇唔到，可想而知係幾咁濃嘅朱古力呢！
真係好食到每次食完都總係覺得唔夠喉！ 

 

        今晚食緊呢個朱古力蛋糕時，Radio 4 啱啱播緊  "Wide Side Story Suite" 裡面嘅 "Maria " ，一路聽、一路食，突然間好有一種所謂 "好幸福" 嘅感覺，唔係誇張，真係笑住嚟食 o架！唔通真係食甜品會 feel 到好幸福！？

 

Notes：
- 若果蛋糕係裂面收腰，就係做得最理想、最完美。

- 若果大家真係跟足小弟個食譜做的話，記得要減糖呀，因為我唔記得啲薄荷酒都
  有甜味，唔記得減糖，所以甜過頭，不過可能就係要咁甜先感覺到幸福！

- Gâteau classique au chocolat  à la menthe (Fr.)：Classic Mint Chocolate Cake

P.S.  今日雖然已經見番太陽，天氣暖番好多，但係，蛋糕焗好出爐時，只係放喺爐門上攤凍幾分鐘，就已經唔駛戴隔熱手套都可以拎得起，就算個焗盤都可以徒手拎住，究竟係我隻手耐熱呀，定係天氣仲係好凍，攪到喺爐內拎出嚟嘅嘢咁快降溫呀，定係凍到我隻手無乜知覺呢！？