黃豆粉鬆餅 Kinako Muffin

    噚日朝早起身後難得清閒，見無乜特別嘢要做，於是又開爐整嘢食，整咗我呢生人第一個和菓子 — 黃豆粉鬆餅。

    我一直都以為和菓子只係指果啲日式精緻甜品，好似草餅呀、大福呀、雪莓娘等等，但自從喺圖畫館借過啲和菓子食譜返屋企睇完之後，先知道原來係包括埋蛋糕、餅乾，甚至係鹹味點心 o添，我真係孤陋寡聞呀！！

    因為今次係我第一次整和菓子，當然梗係揀個最簡單易做嘅入手啦，所以我就選擇咗整呢個黃豆粉鬆餅，話哂都係做慣做熟嘅 muffin 嘛！

 

材料：
低筋麵粉   120克
黃豆粉   30克
泡打粉   1茶匙
牛油   60克
糖   50克
雞蛋   1隻
水   80毫升

以上材料份量可做中 size 鬆餅 4 個。

食譜出自櫻井景子嘅《和菓子‧和甘味 — 秋冬篇》。

- 先將牛油於室溫放軟；麵粉、黃豆粉同泡打粉過篩，均勻混合。

- 牛油打成忌廉狀，之後分 2 - 3 次加入糖，拌勻成牛油霜。

- 雞蛋拂打成蛋液後，分 4 - 5 次加入牛油霜內拌勻。

- 將 1/3 份粉類加入蛋糊內，拌勻後再倒入 40 毫升水混合。

- 當所有材料都拌好之後，再重覆多一次以上步驟。

- 將最後剩低果 1/3 份粉類都加埋入麵糊內，直至麵糊拌到濃稠。

- 將麵糊倒入紙模內至七成滿，放入已預先預熱至 180 °C 嘅焗爐內焗約 30 分鐘
  至熟。

每個小鬆餅都焗到脹卜卜，仲有一般鬆餅嘅裂紋 o添！

 

我另外做咗一個大嘅要嚟做 lunch，因為焗嘅時間比細 size 果啲多
一倍有多，所以顏色焗得比較金黃，而且我仲貪得意灑咗少少
黃豆粉喺上面一齊焗 o添！

 

    初初食第一口時，覺得味道怪怪哋，好似好 "奶" 咁，唔係咁鍾意果味，但當然唔會啦，因為我根本無落奶去整。食完之後慢慢諗吓諗吓，後尾先發覺所謂嘅奶味，其實係好濃好濃嘅豆漿味至真，所以食果陣先至會覺得怪怪咁，因為好唔慣 "食" 鬆散嘅 "固體豆漿" 呀，嘻嬉！

 

Notes：
- 原食譜係用牛奶整，只係我自己用清水代替。

- 我用嘅黃豆粉係中式嘅生黃豆粉，並唔係日式果隻炒熟咗嘅黃豆粉，但櫻井老師
  喺食譜內並無標明用邊一種。或者下次再整時，試吓將啲黃豆粉預先炒熟咗佢，
  睇吓成品有無分別。

- 整好之後嘅麵糊比一般西式鬆餅麵糊濃稠好多，而且帶有少少筋性，好難將佢勺
  入模內，心諗以為自己攪拌過度以至起筋，但焗完出嚟嘅成品又唔會死死實喎，
  都係一樣咁鬆呀，唔怪得之食譜內相片所見，都要用兩隻匙羹幫手將麵糊放入紙
  模裡面啦！