卒之都打敗仗喇！！

        成世人都好憎冬天，又凍、又乾，攪到個人好唔舒服，簡直係恨之入骨！！

        凍：手腳冰冷，唔願郁，朝早起咗身都唔願離開張床，攪到個人鬼死咁懶。

        乾：手腳爆哂拆，裂到流哂血，痛死！上次整玻璃曲奇時 Winnie 都見識過，親眼目睹慘況，差啲血染曲奇麵糰！

        每年我都例必會講嘅說話：冬天有咩好！！

        卒之，喺星期二果晚，即係最凍果幾日，卒之打敗仗，發燒加頭痛，真係慘過 "梁天來"！

        發燒：全身發滾，周身骨痛，肌肉酸軟無力，渾身不自在。

        頭痛：無哂心機，乜都唔想做，簡真痛不欲生，連瞓都瞓唔到，食藥又無用，"典" 床 "典" 蓆，都唔知點好！

        喺呢兩種平生最怕嘅嘢一齊夾攻下，今次仲唔死？死未！

        好彩老豆返嚟煲咗兩次盒仔茶俾我飲，先至退咗燒，個人先舒服番啲咋！不過，唔係呢次病一病，都無機會俾我瞓番夠本。平日根本係唔夠瞓，呢兩日真係乜都補番哂數，幾乎一日 24 小時係咁瞓、係咁瞓，足足瞓哂 48 小時，是因禍得福嗎？連社區中心同老人中心嘅堂都請哂假，一向都唔鍾意請假，病極都要死頂、死撐嘅我，呢次都唔到我唔請假喇，可知我真係幾咁辛苦呢！原本應承好 Gordon 整個 Classic Chocolate Cake 俾佢同佢媽咪，卒之都無整到，佢打電話問我係咪有整蛋糕，我都唔好意思咁同佢講聲 sorry，因為病咗無整到，希望星期一會精神啲，補做番個蛋糕俾佢啦！

         病緊嘅時候，最掛住嘅係邊個，唔駛諗，梗係媽咪啦！我仲發夢見到佢煮米粉俾我食 o添！究竟，我仲有冇機會食到媽咪親手煮嘅米粉呢？