2009年11月25日星期三

黃豆粉鬆餅 Kinako Muffin

    噚日朝早起身後難得清閒,見無乜特別嘢要做,於是又開爐整嘢食,整咗我呢生人第一個和菓子 — 黃豆粉鬆餅。



    一直都以為和菓子只係指果啲日式精緻甜品,好似草餅呀、大福呀、雪莓娘等等,但自從喺圖畫館借過啲和菓子食譜返屋企睇完之後,先知道原來係包括埋蛋糕、餅乾,甚至係鹹味點心 o添,我真係孤陋寡聞呀!!


    因為今次係我第一次整和菓子,當然梗係揀個最簡單易做嘅入手啦,所以我就選擇整呢個黃豆粉鬆餅,話哂都係做慣做熟muffin 嘛!


 


材料:
低筋麵粉   120
黃豆粉   30克
泡打粉   1茶匙
牛油   60克
糖   50克
雞蛋   1隻
水   80毫


以上材料份量可做中 size 鬆餅 4 個。


食譜出自櫻井景子嘅《和菓子‧和甘味 — 秋冬篇》。




- 先將牛油於室溫放軟;麵粉、黃豆粉同泡打粉過篩,均勻混合。


- 牛油打成忌廉狀,之後分 2 - 3 次加入糖,拌勻成牛油霜


- 雞蛋拂打成蛋液後,分 4 - 5 次加入牛油霜內拌勻。


- 將 1/3 份粉類加入蛋糊內,拌勻後再倒入 40 毫升水混合。


- 當所有材料都拌好之後,再重覆多一次以上步驟。


- 將最後剩低果 1/3 份粉類都加埋入麵糊內,直至麵糊拌到濃稠。


- 將麵糊倒入紙模內至七成滿,放入已預先預熱至 180 °C 嘅焗爐內焗約 30 分鐘
  至熟。




每個小鬆餅都焗到脹卜卜,仲有一般鬆餅嘅裂紋 o添!


 



我另外做咗一個大嘅要嚟做 lunch,因為焗嘅時間比細 size 果啲多
一倍有多,所以顏色焗得比較金黃,而且我仲貪得意灑咗少少
黃豆粉上面一齊焗 o添!


 


    初初食第一口時,覺得味道怪怪哋,好似好 "奶" 咁,唔係咁鍾意果味,但當然唔會啦,因為我根本無落奶去整。食完之後慢慢吓,後尾先發覺所謂嘅奶味,其實係好濃好濃豆漿味至真,所以食果陣先至會覺得怪怪咁,因為好唔慣 "食" 鬆散嘅 "固體豆漿" 呀,嘻嬉!


 


Notes:
- 原食譜係用牛奶整,只係我自己用清水代替。


- 我用黃豆粉係中式嘅生黃豆粉,並唔係日式果隻炒熟嘅黃豆粉,但櫻井老師
  食譜內並無標明用邊一種。或者下次再整時,試吓將啲黃豆粉預先炒熟咗佢,
  睇吓成品有無分別。


- 整好之後嘅麵糊比一般西式鬆餅麵糊濃稠好多,而且帶有少少筋性,好難將佢勺
  入模內,心諗以為自己攪拌過度以至起筋,但焗完出嘅成品又唔會死死實喎,
  都係一樣咁鬆呀,唔怪得之食譜內相片所見,都要用兩隻匙羹幫手將麵糊放入紙
  模裡面啦!


5 則留言:

  1. 唔知黃豆粉有冇豆漿咁有營養呢?
    [版主回覆11/25/2009 23:22:00]        我 諗應該無乜分別喇,因為我睇過我果包黃豆粉個成份,只得黃豆一樣咁大把,咁即係無其他料用到啦!所以應該同豆漿一樣咁好營養。         不過,原來我近排先發覺我果包黃豆粉 喺成份度寫明 "基因改造大豆"!!下次唔敢再買呢隻牌子。

    回覆刪除
  2. 但係黃豆係冇豆漿咁好營養架, 冇咁易被吸收
    [版主回覆11/26/2009 00:19:00]        咁好簡單 啫 ,用即沖豆漿粉咪得囉!我 啱 啱先 喺二記度買 咗盒無糖有機即沖豆漿粉,不過我係方便用 嚟整西點時代替牛奶用,隨時要用的話,一沖就得,唔駛次次之前煲定一大煲豆漿,最慘係又唔擺得耐!

    回覆刪除
  3. 其實O個D有冇益架
    [版主回覆11/26/2009 01:45:00]        應該無事 嘅,但其實都只不過係做奶 嘅代替品,有需要時先沖 嚟用,唔係靠佢維持營養。如果要飲就多數自己整豆漿,買呢 啲即沖都係為 咗整西點時隨時要少量都得 啫!

    回覆刪除
  4. 下下自己煲太麻煩:p依家都係出面買無糖豆漿^^" 一星期飲4支
    [版主回覆11/27/2009 17:38:00]        其實都可以用盒裝果隻淡豆漿,不過開封後就唔擺得耐,成日都要幾日內飲哂,都係煩!

    回覆刪除
  5. O個隻好淡呀…依家買出面豆漿鋪既無糖豆漿 ^^
    [版主回覆11/30/2009 00:26:00]        妳講果隻係咪「維他」?我咁耐都只係買過一次 嚟整鹹豆漿咋 ,因為鹹豆漿味道較濃,所以唔係好知原味係點!         豆漿鋪有無糖豆漿賣咩?

    回覆刪除