焗雜果金寶 Mixed Fruit Crumble

        今日開始慢慢補番哂人腦同病期間嘅出品。

        上兩個禮拜不停用水果嚟整嘢食，除咗有我拿手嘅香蕉蛋糕之外，仲有整甜品呀！首先打頭陣嘅係焗雜果金寶。

 

 

 

水果餡

 

材料：

 

富士蘋果      2 個
香蕉             1 隻
西梅乾         5 粒
酒漬櫻桃      適量
黃糖             1 1/2 湯匙
檸檬汁         1 茶匙
冧酒             少許

- 蘋果去皮去芯後切大粒；香蕉切粗件；西梅乾剪細件。

- 燒熱少少油，加入黃糖，加熱煮至糖溶及有少許焦糖化。

- 將蘋果加入兜炒至稍軟身，之後加入香蕉，灒入檸檬汁及冧酒拌勻。

- 加入西梅乾同酒漬櫻桃，兜勻後就即刻熄火。

 

金寶料

材料：

燕麥片         1/4 杯
黃糖             1/4 杯
低筋麵粉      1 湯匙

肉桂粉          適量
檸檬皮茸      1 個檸檬份量

橄欖油         1 湯匙

- 將燕麥片、黃糖、麵粉、肉桂粉及檸檬皮茸放入碗內拌勻。

- 加入油，之後徹底拌勻即可。

 

組合
- 水果餡舀入焗盤內，將金寶料灑喺表面。

- 放入已預熱至 180 ℃ 嘅焗爐內，焗約 25–30 分鐘至表面金黃即成。

 

 

今次用咗 oat streusel 做金寶料，方便易做得多，而且

不單只加有燕麥，仲唔駛用牛油，食得更加健康。

 

呢個焗雜果金寶非常好食，最重要係簡單易做，
真係要成日 encore 至得喇！

Notes：

- 如果唔想太甜的話，可改用青蘋果做餡。

- 想水果餡味道更香濃的話，可改用牛油炒餡料。

- 加入香蕉後要快手完成埋其餘步驟，否則香蕉會煮溶。

- 加入檸檬汁除可增加味道及香味外，更可防止蘋果及香蕉氧化變色。