韓式雜菜煲

唉，真係每隔一段時間，我就會講一次呢句說話：無電腦用好煩，有電腦就更加煩！！

好耐都無 update 個blog 喇，大家係咪好掛住我呢？ 點解咁耐都唔見我
”浦頭”？咪就係因為部腦壞咗囉！喺完全無先兆嘅情況之下，話壞就壞，即刻拎去俾 Micheal check 機，點知佢話俾我聽，係個 CPU 壞咗！呢鑊真係甘，壞得 CPU 即係成部腦換過咁滯，咁就無咗千幾二千蚊喇！！

好啦，部腦整番好之後，個 OS 要 upgrade到 Windows 7，咁就要重新裝過哂所有軟件，喺呢個咁需要時間嘅情況下，居然部腦好番就到個人病，又係感冒失聲囉，唉！病緊又有鬼精神去攪咁多嘢咩，所以咪拖到依家先有精神及時間上網寫
blog 囉！

喺人腦同病呢段時間，我其實都有整嘢食㗎，所以依家都儲咗好多相，等有時間先慢慢補番哂啦！

今日先同大家分享番上星期五晚整嘅韓式雜菜煲先。

 

材料：

娃娃菜

小棠菜

鮮冬菇

金菇

白蘿蔔

蒟蒻芋絲

泡菜

豆腐

薑片

蔥段

清雞湯

 

調味料：

鹽

糖

韓國辣椒醬

 

- 所有蔬菜洗乾淨；白蘿蔔刨皮後切細件；豆腐切厚件；芋絲略沖水，瀝乾備用。

- 將蘿蔔、薑片同豆腐凍水落煲，加入適量清雞湯，之後用大火煲至滾。

- 水滾後就轉慢火，繼續煲至蘿蔔半腍，之後將泡菜連汁一齊加入。

- 水再次煲滾後就落娃娃菜、小棠菜、鮮冬菇及芋絲。

- 煮至菜熟後就加入適量調味料拌勻，最後加埋金菇及蔥段淥一淥就可以熄火上桌。

 

雖然只係一個雜菜煲，但加入咗泡菜同韓國辣椒醬之後，

味道就變得不平凡喇！

 

夏天無乜胃口食飯的話，不妨試試整呢個雜菜煲，
味道清清哋、辣辣哋，好開胃哦！

Notes：

- 白蘿蔔凍水落煲會令湯更加清甜，因為大部份蔬菜嘅甜味都係溶於凍水內。

- 想芋絲味道更加好的話，可預先用少少鮮醬油及糖醃好，其他蒟蒻製食材都可以同樣處理。

- 豆腐宜用實豆腐，會無咁易煮爛，容易保持形狀。

- 想自家製作泡菜的話，可參閱《自家醃製韓式泡菜》及《蘿蔔泡菜》。