2015年8月10日星期一

人生中真真正正的第一份義務工作

        踏入 2015,正正式式人到中年喇,如果根據我嘅家族史嚟睇,人生已經行咗三份之二㖭!到目前為止,雖然不至於一事無成,但都真係無乜特別成就,事業一直都唔多穩定、唔多暢順,有點崎嶇。身邊都有唔少人叫我轉行,其實我都唔係磨爛蓆唔想轉行㗎,不過自己年紀大,對其他行業又毫無認識同經驗,鬼請你做嘢咩!學生又建議我讀僱員再培訓計劃,起碼有工作轉介,好過自己搵,本來都已經揀到心水課程,點鬼知自己又學歷太高,無資格讀!!所以近呢一年嚟都非常清閑,即使好努力咁去拍烏蠅同量地之後,都仲係有好多時間剩,而且亦開始發現自己有點做慣乞兒懶做官嘅心態出現,為咗唔想再繼續懶落去,所以決定將退休後先做義工嘅計劃提早實行,用空閒時間去幫助有需要嘅人,令生活變得更有意義之餘,亦唔會淪為媽咪口中所講嘅 "嘥咗上天俾個人身我"!
 
        要搵義工做,我即刻諗起上年喺《星期二檔案》中介紹過嘅「WeWah 音樂家」,一來可以用番我自己嘅專業去幫人,但更重要嘅係,我可以繼續坐喺冷氣房,唔使出氣出力、日曬雨淋!!:D  WeWah 音樂家」係一個幫助基層家庭小朋友實現學琴夢想嘅慈善團體,小朋友學琴係完全唔使出一分一毫,而所有鋼琴導師同 committee 職員都係義工,而且個個都好 nice,主席跟我聯絡分配學生時,知道我最近卒之搵到新工,佢都同我講其實係完全無壓力,唔需要一定要教,因為佢唔想影響到我的正職及收入。因此「WeWah」俾到我一個好舒服嘅開始,我應該都會一直做落去。
 
 
 今日係舊學生嘅畢業音樂會兼新一學年嘅開學禮,同時亦係
新老師與新學生 "相認" 嘅日子,香港國際音樂
學校借出音樂廳,而英國皇家音樂學院
聯合委員會就係贊助人。






音樂會上唔單只有學生演出,仲有導師演奏,
水準都相當高,係演奏級水平以上!
 





我被分配到兩個學生,如我所願,兩位學生都唔係女仔,今日
就同其中一位 "有緣人" 相認,好好彩佢係一個比較活潑、
開氣嘅男仔;媽咪亦係一個非常明白事理嘅家長,
更加喜出望外嘅係,居然佢哋屋企係有鋼琴,我
真係無諗過一個基層家庭都會有鋼琴呢!
咁我就可以對學生有點要求喇。
 

 



香港著名鋼琴家羅乃新老師係我哋嘅音樂顧問,Miss Loo
喺音樂會上跟小朋友同家長分享學習音樂嘅心得。
 





學生學琴唔單只唔使交學費,就連琴書都免費提供埋,committee
話書倉內有幾百本教材供導師選用,咁啱仲有我一向用開
的一個系列。大部份都係有心人捐贈,有啲仲係
一手全新如果無導師用開琴書的話,
committee 更加會自資出錢買俾學生。
 





        如果大家都有心想幫助基層小朋友實現夢想,但又唔係鋼琴老師的話,其實都有好多其他途徑,可以加入成為義務行政工作人員,捐贈琴書或二手鋼琴,都一樣可以為小朋友出一分力呀!有興趣嘅可以到「WeWah 音樂家」官方網站瀏覽,或者你哋都可以直接同我聯絡,將訊息傳遞到 committee,又或者可以睇吓創辦人同 Miss Loo 嘅簡單介紹

 



10 則留言:

  1. 用自己興趣來做有意義的事,就最開心啦,幫到人很有滿足感。

    回覆刪除
    回覆
    1. 完全同意呀!希望能夠堅持到最後一口氣為止,呢個係我目標。

      刪除
  2. 用自己的專業去做義工,做得輕鬆又滿足,真係最好不過了!
    依家基層小朋友好幸福,冇錢都可以實現理想。
    我都恨左幾十年學琴,但喱D貴族遊戲諗都吾好諗啦。

    回覆刪除
    回覆
    1. 係呀,妳講得好啱,真係最好不過哦!

      基層小朋友能夠圓夢,都係多得香港仲有一班有愛心又熱心嘅有心人。

      都唔係呀,其實妳都可以試試報讀工聯會的初級或成人鋼琴課程,學費平好多好多㗎,作為一個試驗或實習,都唔錯呀!

      刪除
  3. 非常有意義的目標呀,正如 Samwei 所說,用自己興趣做事,一定能堅持和開心的,為您打氣,加油!

    回覆刪除
    回覆
    1. 多謝小月鼓勵呀!其實都應該話係自己嘅榮幸,可以有機會用得到自己嘅專業去幫助基層兒童達成夢想!

      刪除
  4. 可以一展所長,又可以幫到人,真係好好!你要加油呀^^

    回覆刪除
  5. 其實可以用自己興趣做有意義的事,心會特別感到安慰

    回覆刪除
    回覆
    1. 係呀,cici 妳講得無錯,我自己都無諗過可以用自己嘅專業去做義工幫助別人,覺得特別有意義。

      刪除