蜂蜜抹茶曲奇 Honey Matcha Cookie

        剛喺圖書館借咗本健康烘焙食譜，唔用蛋、奶類製品及精製糖，裡面有個黃豆粉唧花曲奇，無論材料同做法都相當簡單，可以好快手就整到，今日即管一試。食譜原本係用黃豆粉同楓糖漿，因為手上都無呢兩樣食材，所以我就改用咗蜂蜜同抹茶粉。

 

        其實 N 年前都已經試過幾次整唧花曲奇，但次次都唔成功，今次反而一擊即中，所以即使個唧花整得唔太靚，但都已經好滿意喇！！估唔到唔用牛油同蛋整成嘅曲奇都一樣咁鬆脆，唔會又硬又實。

 

 

 

材料：
低筋麵粉      65 克
粟粉             15 克
抹茶粉          20 克
蜂蜜             55 克
橄欖油          50 克
鹽                 少許

- 所有粉類過篩兩次。

- 蜂蜜、油及鹽混合，用叉或拂蛋器將材料拂打至濃稠狀。

- 將乾、濕材料混合，用膠刮拌勻成黏稠麵糊。

- 唧袋內放入唧嘴，將麵糊放入袋內。

- 於已墊牛油紙 / 入爐防黏蓆嘅烤盤上唧上麵糊。

- 放入已預熱至 160 ℃ 嘅焗爐內，焗 10 分鐘。

- 將溫度調低至 150 ℃，再焗多 12 – 15 分鐘至麵糊全熟。

- 出爐後放架上攤凍。

 

以上材料份量可做直徑 4 厘米曲奇約 24 塊。

食譜作者特別提到，糖漿與液體油必須拂打

至完全乳化狀態，唔會有糖油分離情況

為止，否則就唔可以成功做到！

用液體油整呢個曲奇有個好處，就係唔會被牛油味蓋過

抹茶味，所以抹茶味特別香濃，仲有淡淡蜂蜜味道。