純素香蕉蛋糕 Vegan Banana Cake

        一直都有不斷去試唔同嘅無蛋食譜去整蛋糕及 muffin，因為希望食齋日都可以有 "蛋" 糕食嘛！但始終都係覺得口感比較黏口，唔係我杯茶。今日終於整到一個口感相對清爽嘅無蛋蛋糕，我估最重要就係當中嘅橙汁。

 

        呢個香蕉蛋糕其實早兩個禮拜都已經整過，但因為當時手上無橙，於是就隨手用豆漿代替，效果當然唔理想啦，入口真係好黏，黏到連老表都話唔好食。

 

        咁啱今個禮拜有香蕉又有橙喺手，唔死心嘅我又再專登買件豆腐整多一次，果然今次好得多，酸性食材對於泡打粉嘅作用原來係咁重要！！

 

 

材料：
低筋麵粉      100 克
全麥粉          50 克
泡打粉          3 茶匙
橙皮茸          1 個橙份量
豆腐             40 克
油                 60 克
黃糖             65 克
鹽                 少許
香蕉             120 克
橙汁              50 克

- 低筋麵粉與泡打粉混合、過篩 2 次，之後加入全麥粉及橙皮茸拌勻。

- 豆腐放攪拌機內打成豆腐蓉，逐少分次加入油，用打蛋器攪拌至兩者完全混合。

- 加入糖及鹽，繼續拂打至完全溶解為止。

- 香蕉切片，與橙汁同放攪拌機內打成香蕉蓉。

- 將香蕉蓉倒入糖油混合物內，用打蛋器攪拌均勻。

- 倒入粉類，用膠刮以切拌方式拌勻即可。

- 將麵糊倒入已塗油嘅中空模內，放入已預熱至 170 ℃ 嘅焗爐內，焗約 45 分鐘。

- 出爐後立即脫模並放架上攤凍。

以上材料份量可做直徑 18 厘米蛋糕 1 個。

 

食譜參考自白崎裕子嘅《幸福手感‧20 分鐘完成的健康甜點》。

 

 

 

 

 

做法其實都唔難，好似整 muffin 咁，濕料溝乾料就攪掂。

食譜中提到，製作重點係乳化作用做得好先係

關鍵，所以豆腐同油如果出現油水分離

情況的話，蛋糕就會做得唔好。

 

雖然口感大大改善，但因為香蕉同橙都唔夠甜，

所以蛋糕味道反而帶有少少酸呢！

Notes：
- 糖嘅用量可依香蕉及橙嘅甜度而增減。

- 根據作者所述，選用較硬身嘅香蕉可以代替雞蛋使用。

- 豆腐最好選用腍豆腐，會比較容易做到乳化效果。

 

- 用中空模可做出鬆軟口感；而用普通模就會做出磅蛋糕質感。