烘多士 & 水果茶

材料：
方包
香蕉
蒜茸醬
水果茶包       

        一睇就知係懶人餐啦！烘四塊多士加一杯橙味水果茶，咁就係我嘅lunch 啦！

        用咗四塊白麵飽，其中兩塊係搽咗香草蒜茸醬，呢隻蒜茸醬幾 OK o架，係 McCormick 出品，啲味道恰到好處，香得嚟又唔會太濃，焗出嚟金黃色又非常吸引。最重要嘅係佢唔係用牛油做，而係全用大豆油，應該會健康啲，同埋無咗我最怕嘅牛油羶味，可能當初媽咪買番嚟試時，都係因為呢個原因。

        另外兩塊就搽咗啲香蕉茸係面，呢個 idea 係我睇 "都市閒情" 學番嚟嘅，個營養師話樽裝果醬好多時糖份都好高，唔係咁健康，所以佢建議用香蕉代替，一來天然，含豐富纖維素及營養，而且亦有一定 嘅甜度，係唔錯嘅選擇，但係就一定要揀啲熟到起黑點嘅香蕉，如果唔係就會唔夠甜 o架啦！

冬菇蠔豉炆海參

        我成日都覺得只會係過時過節先會煮呢個餸，特別有過節 feel。原來整呢個餸都唔係想像中咁難噃。

材料：
冬菇
蠔豉
海參
蒜頭

汁料：
紹酒
蠔油
麻油
糖

        首先預備好所有材料：冬菇先用水浸腍，去蒂洗淨，蠔豉用熱水略為浸軟；海參就預先用薑蔥出水，蒜頭切碎。

        放蒜頭落鑊爆香，加入冬菇、蠔豉略炒一陣，跟住就贊酒，等佢有啲香味，校細火後炆一陣間，之後再落埋啲海參一齊炆 (海參記得唔好咁早落鑊炆，因為過火會煮到溶哂)，跟住就落埋啲蠔油、糖調味，唔駛落鹽，因為有蠔油已經夠鹹。校到最細火炆至所有材料腍身就攪掂，最後加少許麻油，上碟！

        啱啱炆起熱辣辣果陣，真係好香、好吸引，我就用佢嚟撈米線，冬菇爽、蠔豉香、海參滑，效果唔錯。

        媽咪教過我，如果想啲冬菇快啲浸腍，千祈唔好用熱水浸，因為啲冬菇會變韌，只要喺凍水度落啲砂糖，啲冬菇就好快腍 o架啦。依家我個冰箱度都雪咗一盒已經發好咗嘅海參，另一間屋都仲有一盒 o添，點解會有咁多？因為媽咪囉，佢知道自己就快要走，所以佢就不斷咁喺度諗有乜嘢要喺走之前完成哂佢，發海參就係其中一樣。佢叫我攞哂所有乾海參出嚟，教我點發海參，等我之後可以隨手拎嚟煮，唔駛慢慢發咁麻煩，所以發咗好多，有次伯伯同伯娘入嚟探佢果陣，仲俾咗啲佢哋 o添呀！

木瓜雪耳糖水

材料：
木瓜
雪耳
南北杏
冰糖
清水       

        屬於簡單易做嘅中式糖水之一。木瓜去皮去籽，洗淨切件 (最好揀啲比較熟嘅，除咗因為顏色紅啲之外，仲可以令到啲糖水甜啲 )；雪耳浸熱水，待發脹之後，剪去底部木頭部份，洗淨後汆水備用。煲滾水後，將所有材料加入清水中，再次煲滾後，就可以番落個真空煲度，食之前再煲一煲就掂哂！

        好好味，好滋潤呀。

       

自製班戟 & 玉桂香草咖啡

材料：
麵粉
砂糖
泡打粉
水
雞蛋
油

        第一次整 pancake 都幾成功呀，係跟 Shadow Kwan 喺 Amway 本月刊裡面個食譜嚟做嘅。做法都好簡單，先將所有液態材料混合好，跟住將已過篩嘅糖同粉加埋落去，攪拌均勻就可以將麵糊倒落平底鑊度煎 o架啦，食起嚟都好軟熟，唔會硬，加埋啲無糖士多啤梨果醬一齊食，又有另一番風味。啲糖漿都係自己煮 o架，不過就稀咗啲，但甜味就啱啱好。

        之於杯咖啡哩，我就加咗啲玉桂粉同新鮮嘅 Rosemary (迷迭香) 落去，啲Rosemary 係阿珊自己種 o架，佢知我鍾意用香草煮餸，所以咪特登拎啲俾我囉，果然新鮮香草係比乾嘅香好多噃！