素蘿蔔糕

        呢兩年過年 Ernest 媽咪都有送我蘿蔔糕，所以我自己都懶得整。

 

        大年初一去老表家團拜，表姐特別整咗個素蘿蔔糕俾我同大表嫂食，真係食過番噚味，其他食肉人都爭住要食！趁依家都仲買到靚蘿蔔，等我都自己整吓先！

 

        其實都知道唔用臘味整的話，應該要大大多加調味料，但因為我一向食得清淡，而且又怕榨菜會好鹹，所以都唔敢大刀闊斧咁落調味，結果係唔係好夠味囉！不過咁有咁好，反而食得出蘿蔔嘅清甜，係食咗幾廿年蘿蔔糕以來從未有過嘅滋味，始終不時不食係智慧，冬天白蘿蔔當造特別清甜好食！

 

 

材料：
白蘿蔔                  1200 克 (刨皮、去頭尾後計算)
粘米粉                  300 克
粟粉                      100 克
冬菇                      適量
菜甫                      適量
榨菜                      適量

調味料：
浸菇水及蘿蔔汁      約 250 - 350 毫升
鮮醬油                    適量
鹽                           適量

糖                           適量

香菇粉                    適量
胡椒粉                    適量 

- 冬菇處理好之後切粒，浸菇水留用；菜甫同榨菜洗乾淨後切碎。

- 蘿蔔去皮後一半刨絲、一半切條；粘米粉同粟粉混合好備用。

- 燒熱油，爆香冬菇、菜甫同榨菜，之後加入蘿蔔兜炒。

- 倒入調味料，蘿蔔煮至半透明及水份略為煮乾。

- 將火校至最細，倒入粉類拌勻，用慢火邊煮邊攪拌，將材料煮至八成熟。

- 將蘿蔔粉漿倒入已搽油嘅蒸盤內，用中大火蒸約 30 分鐘至熟。

 
以上材料份量可做 8 吋蘿蔔糕 2 底。

 

 

 

喺旺角街市露天檔口買菜甫同榨菜，老闆娘介紹

呢隻泰國菜甫，味道比較甜口，賣 $7 包。

 

因為唔用得蔥，咁啱蘿蔔葉部份又比較長同靚，

所以就用佢嚟代替蔥花整色整水。

 

已煎同未煎前個樣。

Notes：
- 若浸菇水及蘿蔔汁唔夠用的話，可以適量加入上湯或清水。

- 調味料用量因應自己口味而決定。

- 粉類加入後可視乎情況酌量加水。