韓國石鍋飯 Dolsot Bibimbap (돌솥 비빔밥)

        老竇買咗個石鍋返嚟幾年，都完全無咗件事，年年到咗天氣回暖時先記得又無整到韓國石鍋飯！趁呢個禮拜又凍番，快啲試整一次先！

 

 

材料：
冬菇
菠菜
青瓜
翠玉瓜
甘筍
蒜蓉
炒香芝麻
蔥花
雞蛋

- 冬菇浸發好之後去蒂、切片；菠菜浸洗後切成兩段。

- 青瓜、翠玉瓜洗乾淨；甘筍刨皮，全部切絲，備用。

- 燒熱油，爆香蒜蓉，之後加菠菜炒至軟身，加鹽調味後盛起瀝乾水份。

- 之後將其餘材料都分別炒至軟身，加鹽調味。

- 石鍋內用麻油搽勻，之後放上爐上加熱。

- 加入白飯，鋪上炒好材料，灑上蔥花及芝麻。

- 聽到石鍋發出吱吱聲時，即代表鍋身已經夠熱。

- 當所有材料都加熱後就可以，之後再加隻煎蛋放上面即成。

 

- 食時可加入韓國辣椒醬及韓國大醬調味，將所有材料拌勻即可。

 

 

所有材料炒好哂，到時放上飯面一齊加熱。

 

放好哂材料，最後加隻煎蛋就攪掂！

 

我覺得韓國辣椒醬係整個石鍋飯嘅靈魂，

無咗佢就完全失去應有風味！

 

石鍋保溫效果真係好，食到最尾都仲係暖㗎！

 

 

 
 
 
Notes：
- 韓國人係用珍珠米煮飯，所以想正宗的話就記得用珍珠米。

- 冬菇處理方法可參閱《浸發冬菇方法》。

- 石鍋內搽油，除可達到防黏效果之外，仲可以做到有飯焦。