新街市

        歷時超過一年，「領展」喺蝴蝶灣嘅 "皇宮" 卒之都重建完成，以後買餸就好似以前咁方便同多番好多選擇，起碼檔位大番好多，檔主都可以入番多啲貨品俾居民選購。

 

        翻新後嘅街市當然靚好多啦，但都係嗰句，羊毛出自羊身上，貨品價格明顯比之前貴咗。見麵檔哥哥唔單只照舊賣粉麵，依家仲賣埋豆腐芽菜㖭，佢話無辦法，要買多啲嘢先可以賺多啲去 cover 租金，我問佢加咗幾多租金，佢話同舊街市比較貴咗差唔多一陪哦！！

 

 

 

 

基本上個街市仲靚過好多私人屋苑嘅商場。

 

街市正門剛好對正蝴蝶邨地標。

 

舊年農曆新年已經封咗個街市，

到今個月先至正式啟用。

 

新街市同舊街市最大分別係將檔位嘅間隔牆

全部拆哂，改用矮身圍牆，所以整體

感覺大咗好多，一望無際！

 

新街市除咗有冷氣、乾淨乾爽之外，最好就係

有手推車提供，買得多的話就唔使

拎住一袋二袋咁重。

 

哈哈，腦閉塞時都有得參考吓！！

 

      舊街市本身都已經大到分一、二兩期，睇番「領展」喺裝修圍板上面句 slogan 先知，原來以單層街市嚟計，蝴蝶邨街市係全港最大，依家將兩期打通統一規劃，有好有唔好，好嘅就係將貨品依據種類劃分位置，可以一次過睇哂同類檔位，方便格價；唔好嘅就係以前各期街市都有齊哂各類貨品，毋須行哂兩期去買餸，但依家就麻煩啲，可能只係買兩樣嘢，而咁啱呢兩類又位處街市一頭一尾的話，咁就要由頭行到尾先買到，嘥好多腳骨力囉！

 

 

 

 

 

 

 

 

依家多咗好多以前無賣嘅貨品，包括沙律菜、

泰式香料及食材、有機蔬菜，

仲有貴價水果㖭！