蕎麥包 Buckwheat Bread

        經 blog 友小月介紹之後，依家蕎麥已經成為咗屋企嘅長期存貨，多數會用嚟整沙律，間唔中就會加入米內一齊煮飯，今次又有新嘗試，貪得意將蕎麥打成粉後整麵包。

 

        參考過一本麵包食譜，原來蕎麥比裸麥更少麩質，所以用量唔可以太多，最多只可以佔總麵粉用量嘅 20%。可能就係因為用量較少，而且本身味道亦比較清淡，所以成品味道唔係太濃，不過仔細嚐味的話仍然可以食得到味道嘅。

 

 

材料：
高筋麵粉      200 克
蕎麥粉         50 克
即用酵母      2 克
鹽                  2 克
糖                20 克
橄欖油         10 克
米粉            適量

- 除米粉之外，將所有材料混合，逐少加水搓揉及摔打成光滑麵糰。

- 將麵糰滾圓，放入已灑粉嘅兜內，用保鮮紙封好，發酵至約一倍大。

- 將麵糰放入雪櫃內低溫發酵過夜，第二日拎出回溫至室溫。

- 若麵糰仍未發酵到兩倍大的話，可繼續室溫發酵。

- 麵糰排氣後翻麵，靜置 30 分鐘。

- 麵糰再次排氣，做形，放上已墊入爐防黏蓆嘅烤盤上，發酵至兩倍大。

- 喺麵糰表面灑上適量米粉後用刀割紋。

- 放入已預熱至 200 ℃ 嘅焗爐內，焗約 25 分鐘即成。

 

- 出爐後立即移至架上攤凍。
 
 
 

包質超鬆軟！

 
 
 
 
 
 

煙三文魚蕎麥包三文治。

 

 

 

 

 

 

隔夜包可以用嚟整香草蒜蓉包，

加埋甘筍南瓜湯，正！

 
 
 
 
 

Notes：
- 若自己將蕎麥打磨成粉的話，可於沖洗乾淨並瀝乾水份後，放入焗爐內用低溫烘乾，

   之後再放攪拌機內攪打成粉，亦可放白鑊內，用最慢火烘乾，期間不斷兜炒。

- 翻麵方法請參考《超鬆軟的紅麴甘酒麵包》。

 

- 用米粉灑面，好處係入爐焗完之後仍可以保持白色，無的話用麵粉都可以。