黑豆木耳木瓜湯

        今日喺街市買到兩個好靚仔嘅木瓜，菜檔阿姐就話今日木瓜賣得好平，賣 $5 斤，以近排價格以言係咪真係好平就唔知喇，因為好耐無買之餘，自從檔口變到迷你 size 之後就連價錢牌都無位擺，以前就算唔買某樣嘢，但見到個價錢牌都可以大約知道行程，依家就無呢支歌唱喇，而且有啲貨迫住要放喺佢哋檔口入面，要就嗌佢哋拎俾你，無得樣樣都落手落腳自己揀，更加唔好意思叫人家攞好多出嚟俾你揀啦！希望個街市快啲重建完成。

 

        我自己就好怕熟木瓜，唔知點解嗰覺得味道好難聞、好臭，聞到都即刻反胃兼作嘔，但問過好多人又話唔覺得，究竟係我嘅嗅覺有問題呀，定係其他人都同我一樣都聞到同一種味道，但就唔覺得係臭，情況就好似榴槤味咁樣，所以我一般都只會買青木瓜，好彩青木瓜煲湯都一樣咁甜。

好食易整的 focaccia

        買一磅車厘茄真係有排食，整完沙律同 pita 餡料之後都仲有得剩，咁就又整 focaccia 啦！

 

 

中東口袋包 Pita Bread

        呢個 pita 其實之前都已經整過一次，嗰次係跟型仔廚師個 recipe 去整，用平底鑊烘烤，但可惜徹底失敗，無一個可以中空膨脹呢！！

 

        正所謂失敗乃成功之母，從錯誤中學習，如果唔係上次咁失敗的話，我都唔會咁有心機上網搵資料，睇吓自己錯喺邊度，所以上次嘅失敗都並非壞事！睇咗喺網上搜尋到嘅成功製作要點之後，再改試用 blog 友 Allie 嘅食譜，今次終於成功喇，無論係入爐焗定係用平底鑊烘烤都能夠膨脹中空。

 

 

蕎麥雜菜沙律

       禮拜一嗰日係 Charmaine 學校嘅 study leave，所以佢提早咗朝早學琴，之後就可以去補習兼溫書，準備應戰大考。下晝突然間變得好得閒，所以決定去糧倉補給物資，順便買埋沙律菜。

 

        呢期藜麥 (quinoa) 大熱，個個都話要食 super food，但我一直都無試到，一來價錢唔平啦，但其實貴都唔係問題，最怕係唔啱食的話都唔知要唔要好，你知啦，呢啲健康食品唔係個個人都鍾意食㗎嘛，真係送都未必要㗎！！

 

        唔知點解，見到藜麥個樣成日都形住佢係好硬，唔易消化，食到頂心頂肺，呢個亦係我主要無買嚟試嘅原因。早前同 blog 友小月傾開，佢話寧願食蕎麥 (buckwheat) 好過，質地相對比較軟啲，易啲消化，咁啱糧倉都有得賣，而且價錢相對經濟好多，買包試吓整沙律先！

 

 

韓醬煮雜菜

        呢個菜式其實係泡菜薯仔煮鯖魚嘅變奏，除咗食材用料唔同咗之外，連調味料都有啲唔同，除基本韓國辣椒醬之外，仲加多咗韓國辣椒粉、調味麵豉醬同魚露。

 

 

德國酸椰菜

        成日都聽到人講話跟德國鹹豬手一齊食嘅醃酸椰菜好好食，但喺香港好少見到有，上網搵過資料，原來係要攪一大輪步驟去發酵，而且材料都未必買到，所以之後就不了了之！

 

        有次去糧倉入貨時居然俾我見到佢嘅蹤影喎！！

 

 

甜酸豆腐

        呢個餸其實都係為咗清貨而整，見雪櫃仲有啲罐頭菠蘿，再加上要清埋樽茄汁，最好就係整甜酸菜式，一石二鳥，一次過攪掂哂兩樣嘢！

新背囊

        自從我個好拍檔、好戰友榮休之後，我一直都無買番個新嘅大背囊，唔係款同 size 唔啱就係價錢唔啱，所以拖拖吓就無咗件事。

 

        好耐之前有次跟 Winnie 見面交收時，佢見我左一袋右一袋，拎到成隻 “積” 咁，問我做乜唔帶背囊，我話我無背囊用，原來佢將呢句說話記到依家，有次佢 whatsapp 我話買咗個背囊俾我，咁我當然非常開心啦！開心唔係因為有新背囊用，而係老友咁有我心，隨便的一句說話都咁上心，難怪以前媽咪成鬼日都讚佢好，話要介紹個好男仔俾佢喎，我心諗，有好仔我都一手搶咗佢過嚟先啦，幾時到佢要呀，哇咔咔咔咔咔 ~ ~ ~ ~！ XD

 

 

至愛合桃香蕉蛋糕

        香蕉蛋糕係我嘅至愛，容易整又好食，最好就係加埋全麥粉同焗香合桃一齊整，係我最鍾意嘅 combination。

涼拌腐乳茄子

        聽日係十五，所以今晚過咗十一點食飯就要食齋喇！

 

        呢個腐乳茄子其實由細食到大，媽咪簡中都會整，所以係又一追尋兒時味道之作。做法相當簡單，基本上茄子蒸熟後一撈調味料就食得。