中東口袋包 Pita Bread

        呢個 pita 其實之前都已經整過一次，嗰次係跟型仔廚師個 recipe 去整，用平底鑊烘烤，但可惜徹底失敗，無一個可以中空膨脹呢！！

 

        正所謂失敗乃成功之母，從錯誤中學習，如果唔係上次咁失敗的話，我都唔會咁有心機上網搵資料，睇吓自己錯喺邊度，所以上次嘅失敗都並非壞事！睇咗喺網上搜尋到嘅成功製作要點之後，再改試用 blog 友 Allie 嘅食譜，今次終於成功喇，無論係入爐焗定係用平底鑊烘烤都能夠膨脹中空。

 

 

 

材料：
高筋麵粉      150 克
低筋麵粉      30 克
玉米粉         20 克
即用酵母      2 克
糖                 5 克
鹽                 2.5 克
水                  約 120 毫升

- 粉類、酵母、鹽同糖混合，逐少加水搓至起筋，之後繼續搓成麵糰。

- 將麵糰滾圓，放入已灑粉嘅兜內，用保鮮紙封好，發酵約 45 分鐘至兩倍大。

- 麵糰平均分割成 5 份，分別滾圓，然後用擀麵棍擀薄成麵皮。

- 將麵皮放上入爐防黏蓆上，靜置鬆弛 20 分鐘。

- 與此同時，烤盤放入爐內一齊預熱至 250 ℃。

- 麵皮連同入爐防黏蓆一齊放上烤盤，焗約 5 分鐘至麵皮膨脹中空即成。

以上材料份量可做直徑約 5 吋半麵包 5 個。

 

食譜出自 Allie 嘅口袋麵包。

對我嚟講，要將個麵糰擀薄完之後都仍然

保持到咁圓都真係一件艱難事呢！！

五個麵皮之中，兩個入爐焗，三個放鑊烘，頭兩個都仲係

失敗，原本都打定輸數放鑊烘嘅全軍覆沒，點知到

最後一個竟然脹起嚟，可能之前隻鑊始終

都仲係未夠熱，烘到第三個時先

至有足夠高溫令麵皮膨脹。

至於用爐焗嗰兩個哩，入爐無幾耐就已經即刻脹起，

由於無經驗，表面焗得過硬，出爐之後都仲

係保持原形，無疏氣變番平呢！

五件製成品，我自己覺得發唔起嗰兩件反而係最靚仔哦！

放入嘅餡料其實都係之前整蕎麥雜菜沙律

時用剩嘅，塞哂入個包內再加啲

千島醬就食得喇！

 

 

 

 

Notes：
- 麵皮一定要擀得夠薄，烘焗溫度亦需要相對較高，目的係令到麵皮表面於最短時間內
  焗至乾身變硬，麵皮內嘅水氣及空氣未能透過表面蒸發，唯有將麵皮撐開，因而提高
  膨脹中空嘅成功率。

- 若果用平底鑊烘烤的話，須用中火燒熱平底鑊數分鐘，確保溫度能夠瞬間將麵皮烘至
  乾身，當麵皮放入鑊內時就要轉用中慢火，避免烘燶，每隔 1 - 2 分鐘就反轉一次，直
  至麵皮膨脹中空為止。

- 玉米粉即磨碎嘅粟米粉，所以顏色係黃色，並非一般煮餸用嘅白色粟粉，詳情可參閱
 《粟米麵包》。