黑椒醬炒露荀蘑菇鮮白合

        平時我都好少食露荀，一來因為價錢唔平啦，但主要都係食完之後 "交水費" 時會有好濃烈味道，喺番自己屋企都仲好啲，但如果係食完之後要去學生屋企上課的話就有點尷尬喇！

 

        近年街市有啲幼身露荀賣，價錢相對經濟，$12 一紮約有 8 – 10 條，見好耐無食過，又買嚟試吓先！

 

 

材料：
露荀
洋蔥
蒜蓉
秋葵
新鮮蘑菇
新鮮百合

調味料：
紹酒
黑椒醬
糖
麻油

- 露荀切去尾段較硬部份，洗淨後切段；洋蔥去衣後切粗粒。

- 秋葵洗乾淨後切蒂，然後切粒；蘑菇略沖洗後切粗粒。

- 百合洗乾淨，切去啡色部份，之後逐瓣逐瓣剝開，中間條芯棄掉。

- 燒熱油，爆香洋蔥同蒜蓉，之後加入露荀同蘑菇兜炒，灒酒。

- 加黑椒醬同糖調味，將秋葵同百合落鑊，快手兜炒幾下就熄火，灑上麻油後上碟。

呢款幼身露荀唔錯喎，露荀味都好濃，又唔會好似

粗身嗰隻咁會有好大部份硬身食唔到。

基本上成碟食材都係爽口為主，所以都唔使炒太耐，

好快手就煮好，係之前啲洗洗切切功夫多囉！

Notes：
- 若果露荀外皮比較厚同硬身的話，可刨去部份外皮。

 

- 鮮蘑菇可用罐裝蘑菇代替，但口感會比較腍。

 

- 秋葵同鮮百合切忌炒太耐，否則變腍唔爽口。