受寵若驚的厚禮

收到呢盒名牌朱古力當然好開心啦，但係送禮人地位超然，份量又重，接過手的一刻真係有啲受寵若驚，幾乎唔識反應呢！

知我鍾意食黑朱古力，特登送俾我做新年禮物，多謝 Miss Cheng 呀！

法式貝殼蛋糕 Madeleine

        今日算係好得閒，的起心肝試吓用個貝殼模整蛋糕，原來整貝殼蛋糕都好簡單、好好玩哦！

        因為怕失敗，所以噚晚已經睇定哂手頭上所有 madeleine 食譜，原本已經敲定用其中一個食譜，但係到實戰時真係有差池，當然要即刻急謀對策啦！即刻諗番哂噚晚睇過嘅食譜，之後剩低落嚟嗰份麵糊就立刻有改善喇，仲做到外脆內軟㖭呀！ 所以最終都係集合咗幾個食譜做出嚟呢！

       心水清嘅朋友都應該會留意到，凡嚫用溶牛油整嘅嘢我都一定會用液體油代替，慳功夫之餘，之後清潔工作都易好多，仲可以無咗我唔鍾意嘅臊味㖭！一般食譜都會用到檸檬皮茸，但係我唔想為咗嗰少少檸檬皮又走去買個檸檬，反正屋企有橙，就用橙皮茸代替算數，焗出嚟有勁香橙味，一樣咁正呀！

蛇年人日快樂！

過咗十一點已經係初七人日喇，喺度祝各位人日快樂！！

 

往年媽咪喺度時就一定係會煲粥食，前幾年我都有跟呢個習慣去做，但今年老竇又唔喺屋企食，費事煲粥喇！

 

 
今年 Ernest 爹啲送咗一底年糕同一底蘿蔔糕俾我，老竇個 friend 又分咗啲
蘿蔔糕、芋頭糕同馬蹄糕俾我哋，所以我今年自己冇蒸糕呀，
不過今日就整咗個超簡單快手嘅紅豆糕，
再加埋乾燒伊麵應節哦！

伊麵寓意長壽，希望各位都身體健康，龍精虎猛！

至於紅豆糕，當然就係鴻運當頭，步步高昇啦！！

有興趣要食譜的話，可參考《蝦子乾燒伊麵》及《紅豆糕》。

 

玻璃曲奇 Stained Glass Cookie

上年新年時我整咗燕麥紅莓朱古力曲奇帶返去中心度請 Miss Cheng、同事及學生食，當係新春見面禮，點知原來我唔記得咗我其中一個學生係對朱古力敏感，所以佢無得食呀！  我應承佢再整曲奇時就唔會落朱古力，等佢都可以一齊分享，佢仲話不如下次整個星形曲奇呀！嗱，Daryl，雖然我成日都老人癡呆，但我記得你講過呢句㗎，所以今年就為你而整星形曲奇呀！！

之前同 Winnie 整開嗰個食譜唔係咁掂，油脂份量大多，麵糰超軟身，即使已經放入冰格雪硬，到拎出嚟整時都會好快軟身，勁難處理，所以今次就用自己嘅方法去整，效果當然好好多啦，起碼無咁 "哩 hea" 先啦！！

材料：
低筋麵粉 350 克
泡打粉 2 茶匙
牛油 100 克
糖 80 克
糖膠 3 湯匙
雞蛋 1 隻
果汁硬糖 適量

- 麵粉與泡打粉均勻混合，放入凍牛油，用手指將牛油捽入麵粉內成麵包糠狀。

- 加糖拌勻，之後將雞蛋拂打成蛋液，連同糖膠一齊加入，用刀切拌混合。

- 然後輕手將之搓成麵糰，平均分割成 4 份，分別用保鮮紙包好，放入雪櫃內雪 1 個鐘。

- 拎出一個麵糰，攤開保鮮紙，再喺上面鋪多張保鮮紙，之後用擀麵棍將麵糰擀薄成餅皮。

- 先用一個較大嘅模將餅皮 cut 出，放上已墊入爐防黏蓆嘅烤盤上。

- 之後再用一個較細嘅模放喺餅皮中央 cut 出形狀，將中間塊麵皮移走，做成中空狀。

- 將剩出嚟嘅麵皮重新搓成糰，包好後放入雪櫃雪凍，拎出另一嚿麵糰重覆以上步驟。

- 放入已預熱至 170 ℃ 嘅焗爐內焗 6 分鐘，拎出烤盤，將已略切碎嘅硬糖放入中空位置。

- 再次入爐，用150 ℃ 焗多 6 分鐘即可，出爐後曲奇直接於烤盤上放涼數分鐘。

- 當糖完全變硬時就可以移至架上攤凍。

老實講，其實我係好憎整呢款曲奇，超多功夫兼勁麻煩，今次仲無咗 Winnie
幫手一齊整㖭！不過為咗氹小朋友同學生開心，無所謂啦！

橙味嘅心形曲奇係送俾女仔嘅，而提子味星形就送俾男仔，
圓形檸檬味就個個都有份！

Notes：
- 想方便的話，可以將製作麵糰步驟用食物處理器代勞。

- 麵糰雪凍時間需視乎天氣氣溫而增加，確保麵糰保持冰凍，不易軟化。

- 將麵糰分割成多份分別使用，好處係唔使將全部麵糰同時置於室溫而被軟化。

- 由於已成中空狀嘅麵皮非常容易變形，所以最好將麵皮移至烤盤後再 cut 成中空。

- 切忌用牛油紙代替入爐防黏蓆，因為當硬糖溶化後再凝固變硬時會黐實牛油紙。

- 放入糖之後必須將爐溫調低，以免溶糖過熱產生氣泡。

- 出爐後若發覺有溶糖唔均勻分佈的話，可趁熱用竹簽將糖推開，之後再入爐焗多 1 - 2 分鐘，
  表面就可以再次變得平滑。

冬蔭功 Tom Yum Khon

今晚自己一個食，而且又難得唔使教琴，所以完全無 mood 整呢樣整嗰樣，加上早幾日又要返工、又要預備過年嘅嘢，兩日夾埋都瞓唔夠十個鐘，今日都係疊埋心水休息罷喇！

晚餐除咗蒸臘味糯米飯外，仲想整番個簡單兼少功夫嘅湯，煮冬蔭功就最好不過喇！

 

材料：
蝦        2 隻
草菇  適量
番茄       1 個
指天椒 3 隻
南薑  1 小塊
香茅  3 枝
青檸 4 個
檸檬葉  數片
清雞湯     500 毫升
水    500 毫升
魚露    適量
糖    適量

- 蝦洗乾淨，剪去腳及觸鬚、挑腸；草菇洗淨後開邊汆水；番茄洗淨，去蒂、切件。

- 指天椒洗乾淨、去蒂切粗粒；南薑去皮；香茅根部用刀略拍鬆；青檸榨汁；檸檬葉洗淨備用。

- 先煲滾水及清雞湯，之後加入香茅、南薑同指天椒煲一陣間至出味，再加入青檸汁、魚露及糖
   調味。

- 草菇、番茄放入湯內，翻滾後將蝦放入煮熟。

- 最後加入檸檬葉煲多一陣就完成。

完全根據自己口味而調味，當然各種味道都配合得啱啱好啦！

食糯米飯時滯滯哋，飲啖酸酸辣辣嘅湯就最啱喇！

Notes：
- 所有材料份量可根據自己口味而調整。

- 可用淨雞湯或清水，甚至可以自行調節兩者比例。

- 如果唔食得太辣嘅朋友，1 隻指天椒已經足夠。

老表新春禮物

老表話今年做西人，新年禮物送鬼佬嘢喎！

鬼佬食物仲啱我啦！

呢個白蘭地雜果蛋糕真係好正，芳香無比，上次食過之後，
完全合我口味，不過真係唔係個個接受得到㗎，
就我自己而言，係臊咗啲囉！

仲有西班牙風乾火腿，正！




多謝哂妳呀 Lily！！

脆焦糖芝麻雪芳蛋糕

每年大年初一，我同老表兩家人都會相聚伯伯家中團拜，上年大表哥 Tony 話我應該整個蛋糕，好，今年就滿足你啦！

因為年近歲晚特別多嘢做，而且又要返工，咁整雪芳蛋糕就最啱不過喇，簡單易做之餘又不失大方。因為唔想就咁整個原味蛋糕咁求其，所以就整番個超香濃嘅黑芝麻雪芳蛋糕。

好多 blog 友都會好謙咁話自己尚有進步空間，但我嘅抹 cream 技巧
就真係完全唔入流喇！！表姐 Flora 就話好似大卷廁紙喎！
睇真啲又真係幾似公廁用嗰隻大卷廁紙哦！

大老表，攪乜呀你？做乜放脆焦糖放到好似倒垃圾入垃圾桶咁㗎！！
個蛋糕就咁就俾你蹧蹋咗喇！！！！

雖然賣相唔掂，但好彩大家都讚個蛋糕好食，夠鬆軟之餘
又唔太甜，脆焦糖夠脆又無苦澀味。

食譜參考：《芝麻雪芳蛋糕》及《班蘭雪芳蛋糕伴脆焦糖》。

蛇年新春快樂！！

小弟喺度恭祝大家

身體健康‧生活愉快
心想事成‧事事如意

大吉大利

花開富貴

今年大破慳囊，有 $5 - $7 斤嘅紹菜唔買，走去買棵 $12 斤嘅，
因為真係超靚，唔買都對唔住自己！呢棵盛惠 $18 喇！
不過真係好正，又腍又甜呀！！

買得紹菜就梗係要嚟煮齋啦，三十幾年嚟嘅初一都係咁呀，
繼續承傳媽咪呢個傳統囉！

久違了的 pizza

上次整 Mini Savory Muffin 時用剩咗好多西班牙肉腸片，都係要幫佢搵出路喇！見自己都好耐無整 pizza，就用佢嚟整啦！

無整咁耐，好彩都無失手，厚批底好軟熟。

顏色繽紛嘅食材為個 pizza 賣相加唔少分哦！

除咗肉腸之外，仲有粟米同青椒，當然唔少得個自家製番茄醬啦！

批底及番茄醬做法可參考《莎樂美鮮白菌薄餅》。

醃泡菜

之前醃落啲泡菜啱啱噚晚食哂，趁天氣未再凍，今日又再醃過一啲新嘅。

原本諗住今次開始用番韓國辣椒粉嚟醃，但係唔知做乜鬼斷貨斷咁耐，
到依家都仲未有貨返，唯有繼續用番之前嗰隻辣椒粉囉！

我跟嗰本食譜寫住，如果冬天醃的話，用鹽水醃的初階段都要成十幾個鐘，
但香港邊有韓國咁凍呀，所以都唔使咁長嘅，但我都係懶得等，索性
將佢放上電熱水壺上面，兩、三個鐘已經醃到完全軟身喇！

攪掂！室溫發酵三日就醃好喇，之後放入雪櫃保存，慢慢食。

若果你都想自己醃泡菜的話，可以參考番《自家醃製韓式泡菜》。