蔬果蛋糕 Vegetable & Fruit Cake

呢個蛋糕其實係美式甘荀蛋糕嘅變奏，加入咗翠玉瓜同乾果，令到蛋糕材料更加豐富，味道更多層次。

 

我點解會諗到咁樣整呢，主要係因為發覺好多細路，甚至大人都唔鍾意食菜同水果，咁我就即刻諗到上次個甘荀蛋糕，食落都唔係太覺得食到甘荀，咁如果加入其他蔬果，咁咪一樣神不知鬼不覺，間接食咗都唔知囉！

 

    好，今次就先搵學生 Ernest 做測試對象先！因為我記得佢媽咪話佢係食肉獸一族，唔多鍾意食菜。

材料：
甘荀       100 克
翠玉瓜    100 克
橙皮茸    1 個橙份量
雜乾果    60 克
雞蛋       2 隻
黃糖       100 克
黑糖    65 克
橄欖油   100 克
低筋麵粉      120 克
泡打粉    1 茶匙
梳打粉    1/4 茶匙
肉桂粉    1 茶匙
豆寇粉        少許
薑粉       1/2 茶匙
鹽       少許
燕麥片    適量

- 甘荀去皮，翠玉瓜洗乾淨，同刨粗絲，之後將兩樣材料與乾果及橙皮茸拌勻。

- 雞蛋拂打成蛋液；所有粉類混合好後過篩 3 次，備用。

- 黑糖、黃糖同放盆內，加入油徹底拌勻。

- 將一半粉類加入糖油混合物內拌勻，之後將剩餘嘅粉類與蛋液分次交替拌入。

- 蔬果材料加入麵糊內，拌勻後將麵糊倒入已墊牛油紙嘅模內，灑上適量燕麥片。

- 放入已預熱至 180 °C 嘅焗爐內焗約 40 - 45 分鐘至完全熟透。

- 出爐後稍為攤凍，之後切件享用。

以上材料份量可做 5 1/2 吋 X 5 1/2 吋方形蛋糕一個。

 

蛋糕表面嘅燕麥片焗到好香好脆，令鬆軟濕潤
嘅蛋糕多一重口感層次。






蛋糕內加入咗提子乾、杏甫乾同無花果乾，
比起一般甘荀蛋糕更加好味。

    原來 Ernest 唔鍾意肉桂味，但係我問佢嚿蛋糕係咪好難食，佢就話唔難食，最後仲食哂成嚿蛋糕o添！講真，呢隻蛋糕佢就一定唔 buy o架喇，但佢真係無留意到蛋糕內有甘荀同翠玉瓜囉，所以大家都可以考慮用呢類 “絕招” 去 "對付" 嗰啲唔願食蔬果嘅人。

Notes：

- 若果所選用嘅乾果比較大粒的話，最好事先略為切細。

- 由於黑糖嘅濕度係比黃糖同白糖高，所以蛋糕會較淨用黃糖濕潤。

- 甘荀絲同翠玉瓜絲要略為榨一榨乾水份，否則蛋糕會過濕。

- 肉桂粉、豆寇粉同薑粉嘅份量可依個人口味增減。

廈門炒米

上次整完星洲炒米之後，包炒米粉就一直擺喺度無掂過喇。星期一晚煲咗豬骨鯪魚肉粥，順便炒多碟米粉 o添，因為怕淨食粥唔夠飽嘛！媽咪以前成日都話，食完粥之後痾 “篤” 尿都已經無咗！

 

    因為自從媽咪唔喺度之後都好少去茶樓飲茶，對於茶樓嘅炒粉麵已經好陌生，但係就唔知點解成日都會諗番起廈門炒米，咁就啱喇，就試試自己整吧！其實我都唔知個做法係咪正宗，只係參考番上次個星洲炒米做法咋，將啲材料同調味料換一換就算。

材料：
芽菜
韭黃
蔥
五柳菜
炒米粉

 

調味料：
鹽
糖
茄汁
白醋
清雞湯
水
麻油

 

- 芽菜摘根後略沖洗；韭黃同蔥洗淨之後切段。

- 將五柳菜裡面嘅子薑同蕎頭切幼；米粉用清水浸軟。

- 煲滾水，將芽菜快手汆水，盛起瀝乾備用。

- 除麻油外，將其餘調味料同五柳菜落鑊，邊煮邊攪拌，直至茄汁完全煮開。

- 調味料煮滾之後就可以將米粉放入，轉慢火煮至米粉吸收哂所有水份。

- 當水份收乾後就轉番中火，之後喺鑊邊慢慢倒入適量油，將米粉兜炒至乾身。

- 加入韭黃同蔥，並將芽菜回鑊，將所有材料同米粉兜勻。

- 熄火後灑上麻油，拌勻即可上碟。

呢包就係五柳菜喇，簡直係呢個炒米粉嘅靈魂材料。煮調味料時
無論點落調味料都唔似喺茶樓食嘅味道，但一落埋五柳菜
就即刻成事喇！咪睇包五柳菜細細包，
買兩包已經要 $8 喇！

五柳菜裡面有醃酸咗嘅青瓜同紅蘿蔔，仲有子薑同蕎頭，至於第五樣係乜
就真係搵唔到喇，如果無記錯，以前嘅五柳菜
應該係有茶瓜呢樣嘢 o架！

一碟材料極之普通嘅廈門炒米，鉤起唔少兒時一家人去飲茶嘅回憶哦！

Notes：

- 將芽菜汆水可以袪除草青味之外，仲可以防止落鑊兜炒時大量出水。

- 煮調味料時，最後喺加入茄汁同白醋後試一試味，然後再加適量糖調味。

- 煮米粉時必需間中兜抄一下，除可令調味料均勻入味外，亦可避免黐底。

- 韭黃、芽菜同蔥落鑊後快手兜抄幾下就可以，盡量保持爽脆口感。

無油擂沙湯丸

    既然都寫番個燒肉食譜，咁就唔差在寫埋做冬嗰日個飯後甜品 — 擂沙湯丸啦！

材料：
黑芝麻   30 克
糕粉     1 茶匙
金獅糖漿     25 克
花生醬       10 克
糯米粉   100 克
糖   4 茶匙
滾水     20 毫升
凍水     約 60毫升
黃豆粉   適量

 

- 先將芝麻洗乾淨，放白鑊內炒香，然後用攪拌機打成芝麻粉。

- 芝麻粉、糕粉、糖漿及花生醬拌勻成餡料，輕搓成長條狀。

- 用保鮮紙將芝麻餡包好，放入雪櫃內雪至硬身。

- 25 克糯米粉與糖混合好，將滾水撞入，攪拌成糰。

- 再將剩餘嘅糯米粉及凍水加入，拌勻後搓成糯米粉糰。

- 將粉糰搓成長條形，然後平均切成 8 份；雪硬嘅芝麻餡同樣切開相同份數。

- 壓扁糯米粉糰，放入芝麻餡包成湯丸。

- 煲滾水，將湯丸放入煮至浮起，盛起瀝乾水份後趁熱碌上黃豆粉。

- 以上材料份量可做湯丸 8 粒。

芝麻餡搓成長條形，用保鮮紙包好就可以放入雪櫃雪至硬身。

由於用糖漿代替咗傳統嘅豬油，所以芝麻餡唔會流出嚟，
但味道仍然保持之餘亦比較健康。


 

Notes：

- 黑芝麻亦可用白芝麻代替。

- 芝麻餡一定要雪至硬身先可以方便包入糯米粉糰內。

- 做糯米粉糰時，凍水最好慢慢加入，因為唔同牌子嘅糯米粉受水性會有唔同，如果粉糰太
  濕的話，可額外加入糯米粉搓至唔黏手。

- 趁湯丸熱兼微微濕潤時會比較容易碌上黃豆粉。

合桃提子乾裸麥包

    最近搵食譜時，搵番之前喺「煤氣烹飪中心」度跟 Margaret 學整麵包、果醬嘅食譜，先至發覺原來仲有個喺堂上做 demo 嘅合桃提子乾裸麥包自己未試過整，趁今日較為得閒，快啲整番至得！

賣相都 OK 喎！

唔知點解，自己焗包時，啲割紋硬係唔爆得靚呢！？

麵包質地比較實，而且呢次整得唔係咁好，包面同包底都唔係好發得起，
唔知係咪整麵種時做錯咗呢？搵日都整過至得！

自家製焗燒肉

    原本都諗住唔寫番呢個燒肉食譜，因為其實已經係做冬嗰日整 o架喇，不過有 blog 友話佢跟書整燒肉覺得比較繁複，見我呢個方法好似方便啲，希望我可以分享食譜俾佢參考吓，加上之前喺 Facebook 度 post 過張相，個舊同學即刻問我點整，咁我就應承佢遲啲有時間寫好食譜就通知佢啦。

 

    既然應承得人會做，咁就一定要做到 o架啦！你哋知啦，家吓好講誠信 o架嘛，如果你無誠信的話，分分鐘俾幾廿架吊臂車高抄嚟影呀！！
   

材料：
五花腩   約 1 1/2 - 2斤
粗鹽   適量

 

醃料：
玫瑰露   1 茶匙
鹽   2 茶匙
糖   5 茶匙
沙薑粉   1/2 茶匙
五香粉   1/2 茶匙
磨豉醬   1/2 湯匙

 

- 五花腩洗乾淨，去毛後放滾水內汆水 10 分鐘，過冷河後抹乾水份。

 

- 先用豬皮插喺豬皮上插孔，然後將玫瑰露搽勻豬肉部份。

 

- 將 2 茶匙糖、鹽、沙薑粉及五香粉拌勻，再搽上肉面。

 

- 磨豉醬及剩餘嘅 3 茶匙糖拌勻後搽喺豬肉底部。

 

- 用錫紙包好腩肉底部及四周，然後喺豬皮上鋪上粗鹽，要完全蓋住整塊豬皮。

 

- 將腩肉放入雪櫃內醃過夜。

 

- 第二日將腩肉直接放入已預熱至 220 °C 嘅焗爐內焗 20 分鐘。

 

- 拎出腩肉，將表面粗鹽刮走，再放番入焗爐內。

 

- 繼續焗多 30 - 60分鐘至豬肉熟透即可。

呢個就係豬皮插喇，用佢嚟插豬皮真係易如反掌，
如果用叉插的話會嘥好多氣力呀！

豬皮起哂泡，勁鬆脆，化皮燒肉都可以自家焗製喇！

Notes：

- 豬皮一定要保持乾爽，否則焗完之後就唔可以做到鬆化脆皮效果。

 

- 豬皮插孔可以令豬油滲出，將豬皮焗至鬆脆。

 

- 豬肉放入雪櫃時毋須封蓋豬皮，藉此將豬皮水份抽乾。

 

- 包錫紙時，錫紙必須高出豬皮約一吋長度，方便撒上粗鹽覆蓋豬皮。

 

- 留意避免粗鹽跌落豬肉度，否則焗好之後豬肉味道會非常鹹

 

- 入爐時間需視乎腩肉大細及爐溫而作出適當調整。

情人節朱古力

    一早已經買定間 “姑公屋” 嘅我，居然今年情人節會收到朱古力喎，呵呵！

  查實呢啲係 Louisa 幫啲客整嘅朱古力嚟 o架！

啲客當然係要嚟情人節送禮啦！所以 Louisa 就專登用心形模整朱古力。

朱古力入面係軟心柚子餡，酸酸甜甜，勁好味！

綠茶雲石蒸蛋糕

每年年初一去伯伯屋企拜年時，伯娘梗會蒸定一底蛋糕招呼我哋成班嘩鬼，因為真係個個都鍾意食，簡直就係老幼咸宜，我都唔例外，一定捧場。

 

但係我一直都後知後覺，上年先至發現原來食蛋糕係明符其實嘅 “打爛齋砵”，因為有雞蛋嘛，唉……！！所以今年就醒喇，未到伯娘屋企已經不斷提醒自己，一定要抵擋誘惑，記得唔好食呀！！

 

        睇見無得食都唔緊要，咪自己返屋企整囉，況且我一向都好忍得口，雖然鍾意食嘢，但係就好少會恨食一樣嘢恨到 ”囉囉攣”，所以我絕對唔係嗰種食一餐齋之後第二日就要即刻劏隻雞嚟食嘅人！！

材料：
雞蛋 6 隻
糖   220 克
中筋麵粉   250 克
吉士粉   50 克
泡打粉   1 茶匙

綠茶粉   2 茶匙

- 先將所有粉類過篩 3 次；雞蛋用打蛋器拂打至有少少泡即可。

- 加糖入蛋液內，座溫水拂打至糖完全溶解。

- 將粉類逐次篩入，用打蛋器拌勻至見唔到粉粒為至。

- 另外留起約 1/4 份麵糊，加入綠茶粉攪拌均勻，將麵糊靜置 20 分鐘。

- 先將原味麵糊倒入模內，再將綠茶麵糊加入，用竹簽輕手攪拌花紋。

- 依據蒸模大細，用中大火隔水蒸約 10 - 20 分鐘至熟。

原本綠茶麵糊顏色已經調到好深，估唔到一澎漲之後就淡哂色！
好彩都仲食到淡淡綠茶味。

呢個大模就事先將少量綠茶麵糊放落模底，所以顏色明顯好多，
不過因為今次無溝到宇治抹茶粉，所以顏色唔夠鮮綠呢！

Notes：

- 將麵糊靜置 20 分鐘，作用係等麵粉同雞蛋產生乳化作用時，有充分時間融合得更好，更可
  讓泡打粉發揮作用，喺呢段時間內產生更多氣泡。

- 加入綠茶麵糊攪拌花紋時一定要輕手，否則兩種顏色就會完全混合，做唔到花紋效果。

- 其他製作重點可參考家鄉蒸蛋糕。

 

黑糖薑汁年糕

    今年係第一次整年糕，一向不甘於平凡嘅我，當然唔會就咁整底普通年糕啦！原本係諗住整白色嘅椰汁年糕 o架，不過 Ernest 媽咪話俾我聽，原來椰漿食得多對身體唔好，而且新年前 Ernest 就係因為食得太多用椰漿整嘅年糕而食滯咗，小小人仔都辛苦到自己話要入醫院，你話佢真係幾唔舒服至得 o架，Ernest 媽咪話，又椰漿又糯米，想唔滯都難啦！

    就係因為呢個原因，再諗吓之前做冬先食過用椰漿煮嘅紅咖喱，所以我就改咗整黑糖薑汁年糕囉！一來未食過，二來諗住加咗薑汁整嘅年糕會甜甜哋又辣辣哋，應該會幾好食。於是我就參考咗仙姐個印尼椰糖年糕食譜作為基調，然後變化出呢個黑糖薑汁年糕喇！

 

材料：

糯米粉     260克

澄麵   40 克

黑糖   100 克

冰糖   100 克

水     300毫升

薑汁   50 毫升

- 先將黑糖、冰糖、水同薑汁煲滾，當所有糖都完全溶哂之後就熄火、攤凍。

- 糯米粉同澄麵混合好，將糖水慢慢加入，邊倒邊攪拌均勻。

- 粉漿開好之後，過篩入已搽油嘅糕盤內。

- 隔水蒸約個半鐘至熟透。

以上材料份量可做 8 吋年糕 1 底。

 

第一次整無經驗即係無經驗，中央位置有少少白色都唔知咩事，到切件嚟煎
先知原來係未蒸熟，攪到嗰個位好似溏心皮蛋咁！下次蒸年糕時，
喺真空煲拎出嚟之後要再上火蒸番小小時間至得。

呢個年糕好成功呀，煎好之後非常軟糯，又唔會太甜，
仲有少少薑嘅清香同辣味，非常好食。

Notes：

- 如果唔想磨薑汁的話，可以切幾片薑加入 350 毫升水內一齊煲，但薑味應該會稍遜。

- 加入澄麵可減低糕嘅黏性，糕身比較爽。

- 黑糖甜度比較低，所以同時加入冰糖增加甜度。

- 粉漿一定要過篩，因為會有較多開唔勻嘅粉粒。

簡易五香臘味芋頭糕

   

    今年一定要整芋頭糕呀，因為上年老竇讚好食，而且佢又好怕街賣嗰啲勁重五香粉味，所以今年要再 encore 呀！

 

        不過，今次用咗個比較簡單嘅方法整 ( 查實係自己偷懶至真 )，真係慳水慳力，反而老竇話鍾意咁整多啲，皆因可以食到粒粒芋頭喎！

材料：
芋頭   半斤
臘腸   1 條
膶腸   1 條
蝦米   適量
冬菇   3 隻
粘米粉   三兩 ( 112 克 )
水   2 杯
乾蔥頭    4 粒
白芝麻     少許

調味料：
紹酒 少許
雞粉  1 茶匙
五香粉  1/4 茶匙
胡椒粉  適量
鹽  1 茶匙
生抽  1 湯匙

以上材料份量可做 8 吋圓糕 1 底。

- 芋頭刨皮，沖洗乾淨後切粒；冬菇處理後切粒，乾蔥頭去衣後切碎。

- 臘腸及膶腸蒸熟後切幼粒；蝦米洗乾淨，用水浸軟後瀝乾、切粒。

- 粘米粉先用 3/4 杯水開勻成粉漿；芝麻洗淨後放白鑊炒香，攤凍備用。

- 燒熱油，爆香臘腸、膶腸、蝦米、冬菇同乾蔥頭，灒酒。

- 加入芋頭粒同炒，之後加入調味料兜炒。

- 將剩餘嘅 1 1/4 杯水加入，芋頭粒略煮至微微軟身。

- 將粉漿撞入，用慢火兜炒至稠身即可熄火。

- 將芋頭粉漿倒入已搽油嘅糕盤內，之後隔水蒸約 40 分鐘至熟。

- 趁熱灑上芝麻即可。

你睇，就係呢啲清楚見到嘅粒粒芋頭令到我老竇讚好喇！





煎香嚟食就更加惹味啦，而且芋頭係“瘦物“，所以勁吸油，
食落口比起臘味蘿蔔糕會無咁油膩。

Notes：
- 浸蝦米水同浸冬菇水可留用作煮芋頭用，只需加入適量清水湊夠 1 1/4 杯即可。

- 芋頭粒無需蒸到太熟，否則落鑊爆炒時會容易煮爛。

- 粉漿倒入後要用慢火煮，並不斷兜炒，以免黐底。

- 同蘿蔔糕一樣，要放入雪櫃雪過夜，第二日先至可以切件煎香嚟食，咁就唔易爛喇。


P.S.    上年整嘅繁複版芋頭糕：五香臘味芋頭糕

素蘿蔔糕

   由上年年尾開始就唔知點解好似好鬼忙咁，可能係今年早過年，做完冬無幾耐又話過年喇，跟住又病鬼咗，所以都好少時間上網兼巡 blog，就連寫 blog 都無乜時間，其實呢段時間都有整過唔少嘢食 o架，不過真係無時間寫。

 

本來做冬嗰日餐飯嘅燒肉同擂沙湯丸都想寫 o架，不過拖到依家都無乜心機寫囉，就連新年三款蒸糕都未寫呀，依家連元宵都過埋喇！！不過唔緊要啦，有時間分批寫番啦，有興趣的話就將食譜留到出年蛇年用啦！

 

     今日先寫番個素蘿蔔糕先。

材料：
白蘿蔔       斤半 (約 900 克 )
粘米粉   六兩 ( 225 克 )
粟粉  二兩 ( 75 克 )
冬菇   三隻
甘荀   一小段
榨菜    適量
菜甫       適量
白芝麻    少許
水   1/2 杯至 3/4 杯 ( 125 - 187 毫升)

調味料：
生抽   1/2 湯匙
鹽   1 茶匙
糖   1 湯匙
鮮醬油      1/2 湯匙
胡椒粉   適量

以上材料份量可做 8 吋蘿蔔糕 1 底。

- 冬菇處理好之後切粒；榨菜同菜甫洗乾淨之後切碎。

- 蘿蔔同甘荀去皮後刨粗絲；芝麻洗淨後放白鑊炒香，攤凍備用。

- 粘米粉同粟粉混合好後加水拌成粉漿，待用。

- 燒熱油，將冬菇、榨菜同菜甫落鑊爆香，之後加入蘿蔔絲同甘荀絲兜炒。

- 當蘿蔔絲同甘荀絲炒至軟身後，將調味料加入兜炒均勻，並校至慢火。

- 撞入粉漿，快手與所有材料兜勻，用慢火邊煮邊攪拌，將材料煮至八成熟。

- 將蘿蔔粉漿倒入已搽油嘅蒸盤內，用中大火蒸約 30 分鐘至熟即成。

- 趁熱灑上炒香芝麻。

 

 

 

蘿蔔重咗少少，所以額外多出一少碟蘿蔔糕。

煎香後就食得喇！味道比起傳統蘿蔔糕清淡，
無咁濃及膩，各有千秋。

 

Notes：
- 浸冬菇水及蘿蔔水可以留用，加入適量清水湊夠食譜中水嘅份量，之後再用嚟開粉漿，可
  以令到煮好嘅蘿蔔糕更加好味。

- 煮蘿蔔粉漿時，若水份唔夠的話，可額外加入適量清水，煮至自己鍾意嘅濃稠度。

- 蒸糕時需留意水量，若水份蒸乾的話，要酌量加入熱水。

- 蒸好嘅蘿蔔糕要放入雪櫃雪一日至硬身，之後先可以切件煎香。


P.S.    如果想整傳統臘味蘿蔔糕的話，請參閱《瑤柱蘿蔔糕》。

燕麥紅莓朱古力曲奇

   星期五朝早返工前整咗燕麥紅莓朱古力曲奇，帶返去 Miss Cheng嘅藝術中心度請同事及學生食，當係新年見面禮哦！

出爐喇、出爐喇，又香又金黃。





今次材料改咗少少將杏仁改成葵花籽仁，加入朱古力粒
同肉桂粉，仲將一半固體菜油改成牛油。

總共整咗 32 塊，請人哋食完都仲有少少剩，可以留番俾自己食。

呢個燕麥曲奇食譜真係無懈可擊，每次請人食例必個個讚，
好食又夠鬆脆，而且又唔會太甜，讚！

    對食譜有興趣嘅朋友，可參考番燕麥紅莓杏仁曲奇。