鯪魚肉蝦乾蘿蔔糕

        卒之都到我整蘿蔔糕喇！今次跟咗仙姐個食譜整鯪魚肉蝦乾蘿蔔糕。

 

        舊 blog 友如果有印象的話，會記得我屋企習慣初七人日煲粥煎糕，雖然媽咪已經唔喺度幾年，但我都照樣咁做。

 

        仙姐呢個食譜唔錯，用煎鯪魚肉整嘅蘿蔔糕比起一貫用臘味整嘅，口味比較清爽，無咁油膩、無咁滯，而且質地啱啱好，唔會太實，又唔會太削。不過可能因為我食慣淡味，覺得味道比較濃，我整咗 3/4 個食譜份量，照道理應該用 1 1/2 個「濃湯寶」，但我已經只係用 1 個份量都覺得有點鹹呢！

 

材料：
白蘿蔔             2000 克
鯪魚肉             500 克
芫荽                 適量
蝦乾                 80 克
魚湯濃湯寶      2 個
粟粉                 70 克
粘米粉             450 克
海鹽                 30 克
水                    1200 毫升
胡椒粉            適量
麻油                適量

- 蝦乾洗乾淨，用水浸至略為軟身後切粒，浸水留用；蘿蔔去皮後刨絲。

 

- 鯪魚肉加入芫荽碎，攪拌混合好，之後煎香成魚餅再切粒，備用。

 

- 倒 2/3 份水及浸蝦乾水入鑊內，加入蘿蔔及蝦乾煮至軟身，加入濃湯寶及鯪魚肉再煮滾。

 

- 粉類及鹽、油與餘下 1/3 份水拌勻成粉糊，將煮滾蘿蔔湯撞入，快手攪拌均勻。

 

- 將混合物倒入已搽油嘅容器內，隔水蒸約個半鐘至全熟。

 

- 攤凍後即可切件，再煎香進食。

 

食譜出自《頭條日報》獨角仙嘅《魚湯鯪魚肉蝦乾蘿蔔糕》。

老竇今年又有去個農場 friend 度拎百合花同菊花，

仲攞埋呢兩隻大蘿蔔㖭！

用咗 3 款蝦乾嚟整蘿蔔糕，不過就無用到魚湯「濃湯寶」嚟整，

因為老竇之前買落排雞湯「濃湯寶」用剩兩個，

一直都無用到，趁呢次清咗一個先！

3/4 個食譜就可以整到依度咁多底糕呀！

呢日除咗煎糕，仲有煲咗南瓜粟米粥。

Notes：
- 我自己習慣將蘿蔔一半切條、一半刨絲，食落口感會更好。

- 原本應該將熱湯撞入粉糊內，但因為份量太多，隻鑊太重，覺得好危險，所以我就掉轉將
  粉糊加入湯內兜勻，因為我並無熄火，所以兜勻粉漿嘅同時亦可以將材料繼續慢火煮至略
  為乾身，縮短蒸嘅時間。

- 蒸糕容器記得預先搽油，以方便脫模。