2015年2月5日星期四

病魔‧折磨

        我成日都講,我真係一啲都唔怕死,對於所有有信仰嘅人嚟講,死亡只係人生嘅結束,脫離娑婆世間的種種痛苦,同時亦係另一 旅程嘅新開始,有乜好驚呢,但係我自己就好怕老、好怕病,睇到當年嘅表舅父;見到幾年前嘅媽咪;如今見到學生的婆婆,好清楚明白到病魔有幾大威力!!
 
        記得半年多前同大家提起學生 Ryan 婆婆得到重病,已知道無得好轉,只係純粹等時間,所以我整開一啲啱婆婆口味嘅菜式同糕餅時,都會送一份給她,為她打打氣,當時 blog 友們仲話我呢個老師夠哂細心,畢竟每個禮拜都會見到學生及其家人,比起自己家人見面仲要多,所以必會培養出一份感情。前幾日 Facebook 度就睇到 Ryan 嘅一大段文字,終於帶來了這個噩耗!!
 
        噚日 Ryan 媽咪打電話俾我,交代今日上課時間之餘,亦有提及到婆婆嘅事,雖然佢無正面好清楚咁講出,但從佢說話內容,字裡行間,我 feel ……… 婆婆應該係自己選擇放棄,想得到解脫之餘,亦唔想成為家人嘅負擔,所以全家人都痛上加痛,無法接受事實。聽到之後真係覺得好唏噓,病魔不但折磨當事人,仲折騰其家人!!!!可幸嘅係,今日見到 Ryan 媽咪心情比我想像中要好,佢清楚知道一家人始終都要收拾心情,要學識放低傷痛,盡快維持正常生活,唯獨係最擔心 Ryan 公公仲未接受到老伴嘅離去,全家人一直輪流輪班咁陪住佢。
 
        無論點都好,Ryan 婆婆作出嘅決定必定有佢自己嘅原因,畢竟每個人做任何動作、作任何決定都必定係依據自己觀點及感受,自己先至最清楚自己想要啲乜,其他人都應該予以尊重、支持同諒解。
 
        希望婆婆安息,得到真正嘅解脫,一路好走,喺另一世界寧靜安詳地生活。


4 則留言:

  1. 我睇死亡都很輕鬆,反而害怕病症帶來的痛苦。

    回覆刪除
  2. 同意你所講~~長期病真係一種折磨,自己病當然辛苦,但見到身邊人病得辛苦但咩都做唔到一樣難過……

    回覆刪除
    回覆
    1. 係呀,身邊人只能望住病者捱苦,束手無策,只係得個急、得個難過!

      刪除